scheduleसोमवार फाल्गुन ९ गते, २०७३

गाउँ पर्यटनलाई जीवनशैलीसँग जोडेर समृद्धिमा अगाडि बढ्नुपर्छ

राम घले, निर्देशक- घले ट्रेक्स तथा लिवर्टी होलिडे
ram ghale 1
राम घले, निर्देशक- घले ट्रेक्स तथा लिवर्टी होलिडे गाउँ पर्यटन प्रवर्द्धन मञ्चका अध्यक्षका प्रत्यासी

भनिन्छ, नेपालमा पर्यटन उद्योगलाई व्यवस्थित बनाउन सके पर्यटकहरुलाई स्वागत गरेरै नेपालीले मुलुकलाई समृद्ध बनाउन सकिन्छ ।
पर्यटनको व्यापक सम्भावना हुँदाहुँदै यसको लागि आवश्यक पूर्वाधार निर्माण, सम्भावनाको खोजी एवम् पहिचान र परिचालन आवश्यक मात्रामा हुन सकिरहेको छैन । यसको लागि पर्यटन सम्बद्ध सरकारी, गैरसरकारी निकायहरु चुकिरहेका छन् ।

यसै सन्दर्भमा गाउँ पर्यटन प्रवर्द्धन मञ्च (भिटोफ)को निर्वाचन नजिकिँदै छ । यही साउन १६ गते हुन लागेको २०औं वार्षिक साधारणसभामा गाउँ पर्यटनलाई नजिकबाट नियालिरहेका लिवर्टी होलिडेस्घले ट्रेक्सका निर्देशक राम घले चुनावी मैदानमा उत्रिएका छन् । विभिन्न क्षेत्रका अनुभव बटुलिसकेका घले स्वदेश तथा विदेशमा इकोटुरिज्म, रेस्पोन्सिवल एवम् सस्टेनएवल ट्राभलजस्ता क्षेत्रमा पनि अनुभवी छन् । अध्यक्षका प्रत्यासी घलेले आफ्ना प्रतिबद्धताहरु सार्वजनिक गरेका छन् । प्रस्तुत छ, घलेले व्यक्त गरेको प्रतिवद्धताबारे संक्षिप्त कुराकानी :

भिटोफमा राम घलेको उम्मेदवारी किन ?
म लामो समयदेखि पर्यटन क्षेत्रमा क्रियाशील एक युवा उद्यमी हुँ । मेरो विशेष रुचि गाउँ पर्यटनसँग पनि छ । मलाई लाग्छ, अहिलेसम्म भिटोफ नेपालले प्रोडक्ट मात्र बनाउने काम गरिरह्यो तर प्रोडक्टलाई आन्तरिक तथा बाह्य मुलुकहरुमा पर्याप्त मात्रामा बजारीकरण गर्न सकेको छैन । मेरो रुचि, मेरो अहिलेसम्मको कार्यक्षेत्र, मेरा अनुभवका हिसाबले पनि म नयाँ सन्दर्भमा भिटोफको नेतृत्व गर्न सक्छु र यसलाई नयाँ स्थानमा पुर्याउन सक्छु भन्ने मेरो विश्वास हो । म अहिले अमेरिकन सोसाइटी अफ ट्राभल एजेन्ट्स् (आस्ता)को पनि नेपाल च्याप्टर प्रेसिडेन्टको रुपमा क्रियाशील छु । मेरा अनुभव, सिकाई, इच्छाशक्ति र टिम वर्कले भिटोफलाई कार्यक्रमिक हिसाबले पनि नयाँ स्थानमा उठाउन सक्छ भन्नेमा म विश्वस्त छु ।
मतदाताहरुलाई कसरी आश्वस्त पार्न सक्नुहुन्छ ?
सबैभन्दा ठूलो कुरा भिजन हो, मसँग यसबारे भिजन छ । साथसाथै भिजनलाई मिसन र एक्सन प्लानमा ढालेर सम्भवनाहरुलाई अवसरमा बदल्ने अभियानको नेतृत्व गर्न सकिन्छ । केही उदाहरणहरुका कुरा गरौं, अहिलेको युगमा पयर्टनको परिभाषा नै फेरिएको छ । यो एक बहुआयामिक विषय बनिसकेको छ । गाउँ पर्यटनको कुरा गर्दा हामीसँग ठूलो सम्भावना छ । किनकी हामीसँग प्रकृतिले उपहार दिएका स्वर्णिम गाउँहरु छन् । यसलाई पर्यटकीय दृष्टिले पहिचान र परिचालन गर्न सकियो भने आन्तरिक पर्यटनलाई पनि प्रवर्द्धन गर्न सकिन्छ र अन्तर्राष्ट्रिय स्तरमा पर्यटन प्रवर्द्धनमा पनि नयाँ उचाई हासिल गर्न सकिन्छ ।
अर्को कुरा म टिम वर्कमा विश्वास गर्दछु । हरेक सदस्यहरुलाई भिटोफ मेरो संस्था हो भनेर जीवन्त सहकार्यको प्रणाली विकास गर्ने मेरो योजना छ । यो सूचना प्रविधिको जमाना हो । म यस क्षेत्रमा रुचि पनि राख्दछु । यसमार्फत हरेक सदस्यले भिटोफ मेरो हो र यसमा मैले पनि नेतृत्व प्रदान गर्न सक्छु र मेरो भिजनलाई यसमार्फत कार्यान्वयन गर्न सक्छु भन्नेसम्मको अपनत्व महसुस गराउने वातावरण बनाउनेछु ।
अन्तर्राष्ट्रियस्तरमा भिटोफका गतिविधि पुर्‍याउने कुरा गर्नुभयो, कसरी सम्भव छ यो ?
हेर्नुहोस्, यो ग्लोबलाइजेसनको जमाना हो । हामीले हाम्रो स्थान यही सापेक्षतामा खोज्नुपर्छ । हामीसँग योजना र कार्यक्रम हुने हो भने हामी सिंगो विश्वसँग रचनात्मकरुपमा सहकार्य गर्न सक्छौं । अझ पर्यटन क्षेत्रको महत्व यसरी हेर्दा अझ स्पष्ट हुन्छ । यो क्षेत्रसँग सरोकार राख्ने राष्ट्रिय, अन्तर्राष्ट्रिय संघसंस्थाहरुसँग सहकार्यको कुरामा हामी धेरै पछाडि छौं । म मेरो टिमको मद्दतमा यो आयामबाट पनि सम्भावनाको खोजी गर्नेछु ।
यहाँले गाउँ पर्यटनलाई पर्यावरण र सरसफाईका कुरासँग जोड्नुभयो, यसलाई अझ स्पष्ट पारिदिनुस् न ।
हामीलाई थाहा नै छ, अहिलेको पर्यटन पर्यावरणमैत्री बनाउनै पर्दछ । तब मात्र यो दिगोपनासँग पनि जोडिन्छ । हामीले हाम्रो पृथ्वी र पर्यावरण यो भन्दा राम्रो अवस्थामा हाम्रा सन्तान, दरसन्तानलाई हस्तान्तरण गर्न सक्ने कि नसक्ने ? त्यो हाम्रो पुस्ताको चुनौती हो । हामीसँग पर्यावरण नै सुरक्षित रहेन भने हामीले कसरी पर्यटन व्यावसाय गर्न सकौला र ? साथसाथै, अहिले पर्यटन व्यावसाय मात्रै होइन, हरेक व्यावसायहरु समाजप्रति उत्तरदायी हुनुपर्छ भन्ने मान्यता विकास भएको छ । यसर्थ, गाउँ पर्यटनलाई सामाजिक उत्तरदायित्वसँग जोडेर लैजानुपर्छ, सामाजिक कल्याणसँग जोडेर लैजानुपर्छ भन्ने मलाई लाग्छ ।
यो कसरी सम्भव छ, के हो यसमा तपाईको मोडालिटी ?
म चाहन्छु, गाउँघरदेखि नै पर्यटनको सम्भावना भएको ठाउँमा पर्यटन शिक्षा दिइनुपर्छ । यसको लागि हामी सरोकारवाला निकायसँग सहकार्य गर्नु सक्छौं । पर्यटनलाई अब जीवनशैलीको रुपमा विकास गर्नुपर्छ । हामीले सामान्य व्यवस्थापनमा सुधार मात्र ल्याउन सके हाम्रा गाउँहरु धेरै पर्यटनमैत्री बन्न सक्छन् र यसलाई बजारीकरण गर्न सके हामीले पर्यटकलाई गाउँमा स्वागत गरेकै भरमा अर्थतन्त्रमा ठूलो योगदान गर्न सक्छौं । यसका बहुआयामिक फाइदाहरु छन् । यी सबै अभियानको नेतृत्व गर्न म भिटोफमा उम्मेदवारी दिने तयारीमा छु ।

अन्य तपाईंका एजेन्डाहरु १, २, ३ गरेर राख्न सक्नुहुन्छ ?
अवश्य पनि । जस्तो कि म भिटोफका सदस्यहरुलाई पर्यटन प्रवर्द्धन प्रोत्साहन गर्ने कार्यक्रम ल्याउनुपर्दछ भन्ने मान्यता राख्दछु । अहिलेसम्म प्रवद्र्धन गरिएको प्रोडक्टहरुको जुन क्षेत्र हो, त्यो प्रोडक्टको सोही एरियाको व्यक्तिलाई प्रोडक्ट म्यानेजर बनाई त्यो प्रोडक्टको निरीक्षण अवलोकन गर्ने गरी भिटोफले कार्यक्रम ल्याउनुपर्दछ भन्ने मेरो बुझाई हो । यसरी हामीले विभिन्न जिल्ला तथा देशभरी गाउँ पर्यटन सम्भाव्यता भएकोले ती स्थानहरुलाई नयाँ प्रोडक्टको रुप दिन सक्छौं ।
यसको लागि हामीले नेपाल पर्यटन बोर्ड, पर्यटन मन्त्रालय तथा विभिन्न पर्यटन सम्बद्ध संघसंस्थासँग अझ धेरै सहकार्य गरी अगाडि बढ्न सक्छौं । यसैगरी ‘आफ्नो गाउँ आफैं बनाऊँ’ भन्ने राष्ट्रव्यापी अभियान चलाई हरेक गाउँ सरसफाई र पर्यटकहरु आउँदा कसरी सेवा दिने भन्ने प्रयोग गरेर सेवामुलक व्यावसायलाई प्रोत्साहन गर्न सक्छौं ।
यसैगरी अहिले ५० लाख भन्दा धेरै युवाहरु विदेशिएको अवस्था छ र गाउँ पर्यटन प्रवर्द्धन गरेर धेरै मात्रामा पर्यटकहरु नेपाल भित्र्याउन अन्तर्राष्ट्रिय बजारमा गाउँ पर्यटनको प्रोडक्टहरु बजारीकरण गर्न सकिन्छ । यो अवस्थामा गाउँमा रहेका युवाहरु पनि स्वरोजगार हुने र विदेशिन नपर्ने हुनसक्छ । मेरो टिमसँग यस्ता धेरै योजनाहरु छन्, जुन हामी नेतृत्वमा पुग्न सक्यौं भने कार्यान्वयन गर्न सक्छौं ।

प्रतिकृया लेख्नुहोस्:
Vianet
NTC MPoS
Sagarmatha Finance
Sajha Prakashan
Parbhu Bank
Promote your Business with us
Vianet
NTC MPoS
Sagarmatha Finance
Sajha Prakashan
Parbhu Bank
Promote your Business with us

विश्व More

जीवन शैली More

स्वास्थ्य More

पत्रपत्रिकाबाट More

प्रवास More

default-addImage
default-addImage