scheduleआइतवार आषाढ़ ३१ गते, २०७५

फोहोरबाट जुठोपूरो छानेर पेट भर्ने केटीलाई मेहनतले बनायो अरबौं डलरको मालिक

अनुभा तिवारी

ठसक्क बसिरहेर वा दिन आउला नि भनेर पर्खिरहेर पनि कहिँ सफलता प्राप्त होला ? सफलता त्यस्ता मानिसहरुले मात्र पाउँछन्, जो नाभी गाडेरै काममा लाग्छन् । कुनै एउटा चिजमा अलिक राम्रो हुनु सफलताको सुनिश्चितता होइन तर कतिऔं पटकसम्म असफल भएपछि पनि निरन्तर काम गरिरहन पाउनु नै सफलता हो ।

सोफिया अमोरुसोको पनि यस्तै कथा छ । आफ्नो जीवन बचाउनका लागि उनले नौ वर्षको उमेरदेखि नै सानातिना र अनौठा काम गर्न थालिन, यसैले गर्दा आज अमेरिकाकाकै धनीहरुको सूचीमा यिनको पनि नाम समावेश भएको छ । यिनको यो जीवन यात्रा साँच्चै अद्भूत छ । उनले अहिले एउटा ब्राण्ड नैस्टी गैल स्थापित गरेकी छन् । यो ब्राण्ड सबैभन्दा छिटो वृद्धि हुने खालको कम्पनी बनिसकेको छ ।

सोफियाको जन्म १९८४ मा क्यालिफोर्नियाको सन डिएगोमा भएको हो । सोफियालाई डिप्रेसन र अटेन्सन डेफिसिट हाइपर एक्टिभिटी डिस अर्डर भनिने रोग लागेको छ भन्ने थाहा भएपछि उनले विवशतावश स्कूल छोड्नु प¥यो र घरमै उनलाई पढाउन दिन थालियो । उनका आमाबुवाको पनि जागिर खुस्किएपछि त परिस्थिति अझै खराब हुन पुग्यो ।

नौ वर्षको कलिलो उमेरमा उनले आफैं लेमोनेड (कागती निचोरेर बनाइएको सर्वत) बिक्री गर्ने पसल खोलिन् । सोफियाले २२ वर्षको होउन्जेलसम्ममा लगभग १० वटा फरक खालका जागिर खाइसकेकी थिइन ।

युवा वयकी केटी सोफियाले घुमन्ते आदिवासीको जस्तो जीवन जीउन थालिन् । अमेरिकाको पश्चिमी तटमा कहिले यता कहिले उता भुलिँदै चोरी समेत गरिन् । चोरी गर्ने क्रममा एक पटक पक्राउ परेपछि उनलाई जरिवाना तिराइयो । त्यसपछि भने उनले यो खालको जीवनशैली त्यागिदिइन् । अब उनी सन्फ्रान्सिस्को गइन र त्यहाँको कलेजमा आफ्नो भाग्य परीक्षण गर्न थालिन् ।

यसैताका सोफियाले ई–बे मा एउटा अनलाइन स्टोर खोलिन् र त्यसको नाम ‘‘नैस्टी गैल विन्टेज’’ राखिन् । यो नाम पप गायक बेटी डेबिसले सन् १९७५ मा निकालेको एलबममा आधारित थियो ।

सोफिया च्यारिटी सप्स (परोपकारका लागि खोलिएका दोकान) मा गएर राम्रो लागेका कपडा छानेर ल्याउँथिन् र उच्च मूल्यमा बिक्री गर्थिन् । एउटा च्यानल ज्याकट जुन जम्मा जम्मी ५१५ रुपियाँमा खरिद गरेकी थिइन्, त्यसलाई ६४३९५ रुपियाँमा बिक्री गरिन् । सोफियाले कपडा ल्याएपछि छुट्टै शैली (स्टाइल) मा परिमार्जन गर्थिन । त्यसको फोटो खिचेर आकर्षक क्याप्सन सहित ग्राहकका घरमा पुर्‍याउन पनि भ्याउँथिन । केही समय अघि कुनै बेला लिएको फोटोग्राफी कक्षामा सिकेको सीप उनका लागि उधुमै काम लागेको थियो ।

नैस्टी गैल विशेष गरी युवा महिलाका लागि विन्टेज क्लोथ (विशेष शैलीका लुगा) बेच्ने लोकप्रिय ब्रान्ड बनिसकेको थियो । सोफियाले आफ्नो फेसन ब्राण्डको प्रचारप्रसारका लागि ‘माइ स्पेश’ र पछि ‘फेसबुक’ लगायतका मञ्चलाई साँच्चै राम्रोसँग उपयोग गरिन् ।

ई–बेले सन् २००८ (वि.सं. २०६४) मा आफ्नो ब्राण्डलाई पहिलो प्राथमिकतामा राखेको आरोप लगाउँदै नैस्टी गैल को खाता रोक्का गरिदियो । पाँच वर्षसम्म गरेको सबै मेहनत नासिए झैं भएको थियो तर सोफियाले समय खेर नफाली आफ्नो ब्रान्डलाई ई–बेबाट निकालेर छुट्टै स्टोर खोल्ने निर्णय गरिन् ।

आफ्ना कर्मचारीको सहयोगमा लस एन्जेलसमा आफ्नै ‘रिटेल स्टोर’ खोलिन् । त्यो स्टोर खोल्नु अघि नै कमाएको ख्यातिका कारण धेरै लगानीकर्ताले उनीसँग सम्पर्क गर्न थाले । सोफियाले हेर्दा हेर्दै ३१५ करोड रुपियाँ बजारबाट उठाइन् । त्यसबेलासम्म उनको कम्पनीको मूल्य १८०० करोड पुगिसकेको थियो र सोफियाको नाम फोब्र्स म्यागेजिन २०१२ मा धनी महिलाहरुको सूचीमा समावेश भइसकेको थियो ।

व्यापारमा सफलता पाउनुका अतिरिक्त सोफियाले महिला उद्यमीको बारेमा प्रचलित गलत अवधारणालाई जरैदेखि उखेलिन् । महिलाहरुको फेसनका क्षेमा सफलताको नयाँ कीर्तिमान रच्तै सोफिया आधुनिक नारिवादको ज्वाला बोक्ने महिला बन्न पुगिन् ।

महत्वाकांक्षी र साहसी महिलाहरुले प्राप्त गर्ने उपलब्धिप्रति आँखीभौँ खुम्च्याउने अवधारणा र परिभाषा निमिट्यान्न हुने गरी मेट्न युवा महिलाहरुलाई प्रोत्साहित गरिन् । वि.सं. २०७४ बैशाख ८ गते (तदनुसार २१ अप्रिल २०१७) बाट ‘नेटफ्लिक्स’मा प्रशारण गरिएको शृङ्खला ‘गर्ल बोस’मा उनकै कथा चित्रण गरिएको छ ।

सोफियाले कुनै पनि मानिससँग भएको उत्सुकता र महत्वाकांक्षाले उसँग निहित डरलाई जितेपछि आफैंमा परिपूर्ण नहुँदानहुँदै पनि सफलताको चुचुरो/शिखर आरोहण गर्न सकिन्छ भन्ने कुरा विश्वलाई देखाइन । हार नमानी सफल भएरै छाड्छु भन्ने दृढ सङ्कल्पले नै विश्वका एक प्रतिशत मानिसलाई अन्य सर्वसाधारणभन्दा फरक ठाउँमा उभ्याउँछ ।

(केनफोलिओजको सहयोगमा टिएन घिमिरेद्वारा अनूदित)
प्रतिकृया लेख्नुहोस्:

सम्बन्धित शीर्षकहरु

आजको लोकप्रिय

NTC
Vianet
Sajhajob