scheduleशनिवार आश्विन ४ गते, २०७६

नेपाली युवा वैज्ञानिक डा. खड्का जापानमा पुरस्कृत

काठमाडौं, २३ असार । नेपाली वैज्ञानिक डा. ध्रुव खड्का वैकल्पिक ऊर्जा विकासको क्षेत्रमा गरेको अनुसन्धानको लागि जापानमा पुरस्कृत भएका छन् । सौर्य ऊर्जालाई विद्युत ऊर्जामा परिवर्तन गर्न प्रयोग गरिने एक नवीनतम तथा बहुउपयोगी पदार्थ हेलाइड पेरोभस्काइटको बारेमा गरेको अनुसन्धानलाई उत्कृष्ट ठहर गर्दै युवा वैज्ञानिक खड्का पुरस्कृत भएका हुन् ।

खड्कालाई उनी कार्यरत जापानको एक प्रतिष्ठित राष्टिय अनुसन्धान संस्थान ‘नेशनल इन्स्टिच्युट फर मटेरियलस साइन्स’ले स्वच्छ ऊर्जा पुरस्कार-२०१७ प्रदान गरेको हो । जापानको शिक्षा, संस्कृति, खेलकुद, विज्ञान तथा प्रविधि मन्त्रालय अन्तर्गत रहेको यस अनुसन्धान संस्थानले वैकल्पिक ऊर्जाको क्षेत्रमा अनुसन्धान गर्ने वैज्ञानिकमध्येबाट प्रत्येक वर्ष एक उत्कृष्ट अनुसन्धानकर्तालाई अवार्ड अफ इनोभेसन दिने गर्दछ ।

त्रिभुवन विश्वविद्यालय भौतिकशास्त्र केन्द्रीय विभागबाट स्नाकोत्तर खड्काले इन्चन नेसनल विश्वविद्यालय दक्षिण कोरियाबाट सन् २०१६ मा विद्यावारिधी पुरा गरेका थिए । हाल उनी जापानको साइन्स सिटिको नामले चिनिने चुकुबा सिटिस्थित अनुसन्धान संस्थान अन्तर्गत इन्टरनेसनल सेन्टर फर योङ्ग साइन्टिस्टसमा अनुसन्धानरत छन् ।

उदयपुर जिल्लाको चौदण्डी नगरपालिकाका स्थायी घर भएका खड्काले सौर्य ऊर्जाबाट विद्युत ऊर्जामा निकाल्न आवश्यक विभिन्न पदार्थहरुको बारेमा दर्जनौं अनुसन्धान लेखहरु प्रकाशित गर्नुका साथै विभिन्न अन्तराष्टिय वैज्ञानिक सम्मेलनहरुमा आफनो अनुसन्धानलाई प्रस्तुत गरिसकेका छन् ।

पेट्रोलियम पदार्थको भण्डार रित्तिदै गइरहेकाले निकट भविष्यमा आउने ऊर्जा संकट समाधान गर्नेतर्फ उनी अनुसन्धानरत छन् । अहिले भईरहेको अत्यधिक कार्बन उत्सर्जनको कारणले निम्तिएको वातावरणनीय प्रभाव न्यूनीकरण गर्न स्वच्छ वैकल्पिक ऊर्जाको प्रचुर सम्भावना भएको सौर्य उर्जालाई सस्तो तथा भरपर्दो विकल्प बनाउनको लागि विकसित देशमा अनुसन्धानकर्ताहरुको ठूलो हिस्सा लागिरहेको छ । अबका केहि वर्षमा सौर्य ऊर्जा सबैभन्दा सस्तो वैकल्पिक ऊर्जा हुने खड्काको विश्वास छ ।

मानव समुदायको दैनिकी तथा स्वच्छ पर्यावरणसँग प्रत्यक्ष्य जोडिएको वैकल्पिक ऊर्जाको अनुसन्धानको लागि दिएको उपाधिले आफुलाई काम गर्न थप ऊर्जा मिलेको खड्काले साझापोस्टसँग बताए ।

Loading...
प्रतिकृया लेख्नुहोस्:

सम्बन्धित शीर्षकहरु

आजको लोकप्रिय

Nepali Patro
Vianet
default-addImage