scheduleबुधवार आश्विन १ गते, २०७६

बलात्कारपछि हत्या भएको भन्दै जलविद्युत आयोजनामा तोडफोड, करोडौंको क्षति

फाइल तस्बिर

बझाङ, २७ असार ।  सुदूरपश्चिम प्रदेशको गौरवको योजना मानिएको बझाङको बुंगलमस्थित कालंगा हाइड्रो प्रालिको फिल्ड कार्यालयमा तोडफोड भएको छ ।

हाइड्रोका जेसीबी चालक माधव बोहरालगायतले बुंगल नगरपालिका–२ बस्तीकी ललिता धामीको सामूहिक बलात्कार गरी हत्या गरेको भन्दै स्थानीयले दोषीलाई कारवाहीको माग राखेर तोडफोड गरेका हुन् । यसले हाइड्रोको कामसमेत प्रभावित बनेको छ ।

बझाङको बुंगलमा रहेको कालंगा हाइड्रो प्रालिको फिल्ड कार्यालयमा स्थानीय र विद्यार्थीले तोडफोड गरेका कारण झन्डै १५ करोड रुपैयाँ बराबरको क्षति भएको छ ।

असार १६ गते स्थानीय ललिता धामीको सामूहिक बलात्कारपछि हत्या भएपछि आक्रोसित स्थानीय र विद्यार्थीले तोडफोड गरेका हुन् ।

हाइड्रोका चालक माधव बोहोरासमेत बलात्कारपछि हत्याको घटनामा संलग्न रहेको आरोपमा तोडफोड गरिएको बताइएको छ ।

तर कालंगा हाइड्रो प्रालिका संस्थापक वीरेन्द्र मल्लले भने दुःखद घटना भए पनि पीडित परिवार, जनप्रतिनिधि र हाइड्रोबीच सहमति भइसकेपछि केही व्यक्तिले घटना भएको पाँच दिनपछि सुनियोजित ढंगले तोडफोड गरेको आरोप लगाए ।

बुंगल नगरपालिका–१ का कार्यालय सहयोगी हरिकृष्ण धामीले भने विद्यार्थीले शान्तिपूर्ण आन्दोलन गरेको भए पनि हाईड्रोप्रति असन्तुष्ट पक्ष त्यसैमा मिसिएर तोडफोड गरेको बताए ।

महेन्द्र माविका व्यवस्थापन समितिका अध्यक्ष जननी धामीले जेसीवी चालक माधवबहादुर बोहरा र ललिताबीच प्रेमसम्बन्ध रहेको र उनीहरुबीच केही विवाद आएपछि बोहराले टिपरले किचेर मारेको बताए ।

मृतक ललिता धामीका बुबा कलक धामीले भने अभियुक्त बोहराले आफ्नी छोरीलाई बलात्कार गरी हत्या गरेकाले कारबाही गर्न माग गरेका छन् ।

प्रमुख जिल्ला अधिकारी सुरेश सुनारले विद्यार्थीलाई उक्साएर हाइड्रोमा तोडफोड गर्नेहरुलाई कारबाही गर्ने प्रतिबद्धता व्यक्त गरेका छन् ।

तोडफोडपछि हाइड्रोको कार्यालयमा ठूलो संख्यामा सुरक्षाकर्मी परिचालन गरिएको छ ।

तर, बलात्कारपछि हत्या भएको घटनामा हाइड्रोका सवारी चालकको समेत संलग्नता रहेको पाइएपछि स्थानीयवासीको आक्रोस थामिएको छैन ।

यसले सुदूरपश्चिम सरकारको गौरवको आयोजना मानिएको ६५ मेगावाट क्षमताको कालंगा हाइड्रोको काम प्रभावित हुने संकेत देखिएको छ ।

Loading...
प्रतिकृया लेख्नुहोस्:

सम्बन्धित शीर्षकहरु

आजको लोकप्रिय

Nepali Patro
Vianet
default-addImage