scheduleसोमवार चैत्र २४ गते, २०७६

वैज्ञानिकलाई ठूलो उपलब्धीः मुसामा सफलतापूर्वक कोरोनाको खोप परीक्षण

एजेन्सी, १ चैत । बेलायतका वैज्ञानिकहरुले कोभिड-१९ विरुद्धको खोप विकास अन्तिम चरणमा पुगेको बताएका छन् ।

लण्डनका वैज्ञानिकले नयाँ भाइरसविरुद्धको खोप विकास कार्य अन्तिम चरणमा पुगेको बताएका छन् । वैज्ञानिकका अनुसार कोभिड-१९ विरुद्धको खोप मुसामा सफलतापूर्वक परीक्षण भइसकेको छ ।

Dish_Home

यही जुनसम्ममा मानवमा पनि कोरोनविरुद्धको खोप परीक्षण गर्न सकिने वैज्ञानिकहरुको भनाइ छ ।

लण्डनस्थित इम्पेरियल कलेजका चिकित्सक रबिन श्याटकको नेतृत्वमा रहेको वैज्ञानिकको एक टोलीले कोभिड-१९ को खोप तयार गरेको हो ।

श्याटकको नेतृत्वमा रहेको टोलीले मुसामा नयाँ खोप परीक्षण गरिसकेको छ । उक्त परीक्षण सफल भएको र जुनसम्ममा मानवमा परीक्षण गरिने मेट्रो समाचारले जनाएको छ ।

हाल पेरिसका वैज्ञानिकसँग मिलेर बाँदरमा खोप परीक्षण गरिने कार्य भइरहेको र त्यसपछि खोपको प्रभावकारिताबारे थप प्रस्ट हुने समाचारमा उल्लेख गरिएको छ ।

कोरोना भाइरसको खोप विकासमा संलग्न वैज्ञानिकहरूले थप बजेटको पनि माग गरेका छन् । उनीहरूका अनुसार अनुसन्धान र परीक्षणका लागि पर्याप्त बजेट उपलब्ध भएमा अर्को वर्षदेखि खोप बजारमा आउने छ ।

‘सुरुमा मुसालाई खोप दिएको थिएँ र मुसामा खोपले निकै राम्रोसँग काम गरेको थियो । त्यसपछि खोप प्रभावकारी भएको निष्कर्ष निकालेको हुँ’, डेली एक्सप्रेससँग कुरा गर्दै वरिष्ठ अनुसन्धानकर्ता डा. पल म्याकेले भने ।

मेडिकल रिसर्च काउन्सिलसँग मानिसमा खोप परीक्षण गर्नका लागि पैसा मागेको पनि म्याकेले बताए । ‘मानिसमा परीक्षण गर्नका लागि पैसा उपलब्ध भयो भने हामीले जुनसम्म मानिसमा खोप परीक्षण गर्न सक्छौं’, उनले भने, ‘बेलायती वैज्ञानिकले खोप विकास गरेको अवस्थामा सरकारले सहयोग गर्दा निकै राम्रो हुन्छ ।’

यदि मानिसमा पनि खोप परीक्षण सफलतापूर्वक हुन सक्यो भने अर्को वर्षसम्ममा खोप सर्वत्र उपलब्ध हुने वैज्ञानिकहरुले प्रस्ट पारेका छन् ।

कोरोना भाइरसले विश्वव्यापी महामारीको रुप लिइरहेका बेला वैज्ञानिकले गरेको सफल परीक्षणबाट केही आशा पलाएको छ । चीन, जापान र अमेरिकाका वैज्ञानिक पनि खोप विकासमा सक्रिय भएर लागि परेका छन् ।

 

 

default-addImage
default-addImage
प्रतिकृया लेख्नुहोस्:

सम्बन्धित शीर्षकहरु

आजको लोकप्रिय