scheduleसोमवार आषाढ़ २९ गते, २०७७

भूमि फिर्ता गर्ने प्रक्रिया तत्काल सुरु गर्न माग गर्दै गोविन्द केसीद्वारा सत्याग्रहको घोषणा

फाइल फोटो

काठमाडौं, १२ जेठ । सरकारलाई नेपाली भूमि फिर्ता गर्ने प्रक्रिया तत्काल सुरू गर्न माग गर्दै डा. गोविन्द केसीले सत्याग्रह सुरु गर्ने घोषणा गरेका छन् ।

सोमबार एक विज्ञप्ति जारी गर्दै डा. केसीले जेठ २० गतेदेखि दुई दिन सत्याग्रह गर्ने घोषणा गरेका हुन् । उनले सत्याग्रहको उद्देश्यलाई स्पष्ट पार्दै भनेका छन्, ‘राष्ट्रवादको बहकिएको बहसलाई सही ठाउँमा ल्याउन तथा सीमाञ्चलका मानिसहरूको पीडाप्रति राज्यको ध्यानाकर्षण गराउँदै त्यहाँको शिक्षा, स्वास्थ्य, यातायात र जीविकाको उचित व्यवस्था गर्न तथा नेपालको सार्वभौमसत्ताको रक्षा गर्दै भारतबाट मिचिएको नेपाली भूमि फिर्ता गर्ने प्रक्रिया तत्काल सुरू गर्न माग गर्दै हामीले यही जेठ २० गतेदेखि दुई दिने सत्याग्रह गर्ने घोषणा गर्दर्छौं ।’

विज्ञप्तिमा उनले हालसम्म सरकारले पूरा गर्ने प्रतिवद्धता जनाएका आफ्ना माग पूरा गर्न पनि माग गरेका छन् । उनले भनेका छन्, ‘हामीसँग हालसम्म भएका सबै माग पूरा गर्न, त्रिवि चिकित्साशास्त्र अध्ययन संस्थानमा वरिष्ठताका आधारमा डिनलगायतका पदाधिकारी नियुक्ति लगायतका सम्झौता कार्यान्वयन गर्न तथा गण्डकी प्रदेशलगायत डडेल्धुरा, बर्दिवास, उदयपुर, इलाम लगायतका ठाउँमा सरकारी मेडिकल कलेज खोल्ने प्रक्रिया द्रुत गतिमा अघि बढाउन माग गर्दछौं ।’

डा. केसी अहिले दार्चुलामा रहेका छन् । उनले त्यहीँबाट जारी विज्ञप्तिमा भनेका छन्, ‘नागरिकको जीविका सहज बनाइदिन पनि नसक्ने, तिनको शिक्षा र स्वास्थ्यको प्रबन्ध पनि गर्न नसक्ने अनि अर्काले आफ्नो भूमि हडपेर सडकलगायतका संरचना बनाइसकेपछि मात्रै थाहा पाउने हो भने यो सरकारको भूमिका र औचित्य के भन्ने प्रश्न उठेकाबारे पनि सम्बन्धित सबैको ध्यानाकर्षण गराउँछौं ।’

प्रतिकृया लेख्नुहोस्:

सम्बन्धित शीर्षकहरु

आजको लोकप्रिय