scheduleबुधवार आषाढ़ ३१ गते, २०७७

यस्तो छ बजेटको ४ उद्देश्य र ६ प्राथमिकता

काठमाडौँ, १५ जेठ । अर्थमन्त्री युवराज खतिवडाले आगामी आर्थिक वर्ष २०७७/०७८ को बजेट प्रस्तुत गरिरहेका छन् । उनले बजेटको प्रथम उद्देश्य कोरोना लगायतका संक्रामक रोग र विपद्‍बाट नागरिकको जीवनरक्षा हुने जानकारी दिएका छन् ।

उनले सोही उद्देश्यअनुसार आवश्यक बजेटको व्यवस्था गरिएको बताए । संघीय संसदको संयुक्त बैठकमा बजेट प्रस्तुत गर्ने क्रममा मन्त्री युवराज खतिवडाले आगामी वर्षको बजेटका उद्देश्य निम्न रहेको जानकारी दिएः

क. संक्रामक लगायत सबै प्रकारका रोग र विपद्बाट नागरिकको जीवनरक्षा गर्दै जनजीवनलाई सहज र सुरक्षित बनाउने ।

ख. उपलब्ध साधन स्रोत, अवसर र क्षमताको उच्चतम परिचालन गरी शीघ्र आर्थिक पुनरूत्थान गर्दै आर्थिक विकासको गतिलाई निरन्तरता दिने ।

ग. नागरिकका मौलिक हक र अधिकारका रूपमा रहेका आवश्यकता परिपूर्तिमार्फत राज्यको लोककल्याणकारी भूमिका बढाउने । र,

घ. सामाजिक, आर्थिक र भौतिक विकासमार्फत उत्थानशील, समुन्नत, स्वाधीन, समृद्ध एवं समाजवाद उन्मुख अर्थतन्त्र निर्माण गर्ने ।

यी हुन् बजेटले निर्धारण गरेका यी उद्देश्य पूर्ति गर्नक लागि क्षेत्रगत प्राथमिकता

१. कोरोना लगायत सबै प्रकारका स्वास्थ्य जोखिमबाट नागरिकलाई सुरक्षित राख्न र गुणस्तरीय स्वास्थ्य सेवा सर्वसुलभ बनाउन स्वास्थ्य सेवाको दायरा विस्तार, स्वास्थ्य पूर्वाधार निर्माण तथा स्तरोन्नती र स्वास्थ्य जनशक्ति विकास ।

२. कोरोना भाइरस संक्रमणको रोकथामको लागि चालिएका कदमबाट टुटेको आपूर्ति श्रृंखलालाई पुनर्स्थापित गर्दै कृषि, उद्योग, पर्यटन, निर्माणलगायत प्रभावित क्षेत्रको पुनरुत्थान ।

३. नागरिकका लागि काम र रोजगारीका अवसर, सुरक्षित आवास, सार्वकालिक सामाजिक सुरक्षा र संरक्षण ।

४. विकासको शीघ्र प्रतिफल प्राप्त हुने, आगामी वर्ष सम्पन्न हुने अधुरा आयोजनाहरूको कार्यान्वयन ।

५. गुणस्तरीय र जीवनोपयोगी शिक्षा, सूचना प्रविधिको विस्तार, आधारभूत खानेपानी, लगायतका सामाजिक, आर्थिक तथा भौतिक पूर्वाधारको विकास तथा निर्माण ।

६. संघीयता कार्यान्वयन, गुणस्तरीय तथा पहुँचयुक्त सामाजिक सेवा र उत्तरदायी तथा पारदर्शी शासन व्यवस्थाको सुदृढीकरण ।

प्रतिकृया लेख्नुहोस्:

सम्बन्धित शीर्षकहरु

आजको लोकप्रिय