scheduleशनिवार श्रावण २४ गते, २०७७

राखेप बोर्डमा छ सदस्य मनोनित

काठमाडौं, १५ साउन । युवा तथा खेलकूदमन्त्री जगतबहादुर विश्वकर्माले राष्ट्रिय खेलकूद परिषद् (राखेप)को बोर्डमा छ सदस्य मनोनित गरेका छन् । राखेपको उपाध्यक्ष र सदस्य सचिवलाई शपथ खुवाएको भोलिपल्ट मन्त्री विश्वकर्माले विभिन्न क्षेत्रबाट प्रतिनिधित्व हुनेगरी छ जनालाई बोर्ड सदस्यमा मनोनयन गरेको मन्त्रालयद्वारा आज जारी विज्ञप्तिमा उल्लेख छ ।

राष्ट्रिय खेलकूद विकास ऐन, २०७७ अन्तर्गत राखेपको अध्यक्षमा भने मन्त्री वा राज्यमन्त्री रहने व्यवस्था छ । मन्त्री विश्वकर्माले खेल विज्ञ, खेलकूद प्रशिक्षक, खेलकूद प्राविधिक वा एन्टी डोपिङ विज्ञका रुपमा राखेपका पूर्वअधिकृतसमेत रहेका चितवनका रिम रानाभाट र ओखलढुङ्गाका इन्दिरा निरौलालाई मनोनयन गरेका छन् ।निरौला यसअघि पनि राखेप सदस्य थिइन् ।

यस्तै मन्त्री विश्‍वकर्माले राष्‍ट्रिय खेल संघको सिफारिसबाट काठमाडाैंका अर्जुन केसी, बागलुङका सम्पन्‍न श्रेष्ठ र चितवनका सुवास श्रेष्ठलाई पनि मनोनयन गरेका छन् । उनले परम्परागत, साहसिक तथा पर्यटकीय खेल क्षेत्रको प्रतिनिधिका रुपमा नुवाकोटका गोविन्द्रप्रसाद भट्टराईलाई मनोनयन गरेका छन् ।

मन्त्रालयले यसअघि नै राखेप उपाध्यक्षमा शिव कोइराला र सदस्य सचिवमा रमेशकुमार सिलवाललाई नियुक्त गरेको थियो । उनीहरु दुवैले बुधबार पदभार ग्रहण गरेका थिए । रासस

प्रतिकृया लेख्नुहोस्:

सम्बन्धित शीर्षकहरु

आजको लोकप्रिय