scheduleबुधवार आश्विन ६ गते, २०७८

चाडपर्वका मौलिक पक्षलाई जीवित राखौँ : मुख्यमन्त्री गुरुङ

पोखरा, ५ भदौ । गण्डकी प्रदेशका मुख्यमन्त्री पृथ्वीसुब्बा गुरुङले सांस्कृतिक चाडपर्वहरु मनाइरहँदा ती चाडका मौलिक पक्षलाई जीवित राख्‍न र मितव्ययिता अपनाउन आवश्यक रहेको बताएका छन् ।

हरितालिका तीज पर्वका अवसरमा आज एक शुभकामना सन्देश जारी गर्दै गुरुङले स्वदेश तथा विदेशमा रहेकका सम्पूर्ण दिदीबहिनी तथा दाजुभाइमा सुःख, शान्ति, समृद्धि सु–स्वास्थ्य एवम् उत्तरोत्तर प्रगतिको शुभकामना समेत व्यक्त गरेका छन् ।

सन्देशमा उनले नेपालमा मनाइने मौलिक चाडपर्वहरुले सामाजिक सद्‍भाव तथा सांस्कृतिक सह–अस्तित्व अभिवृद्धि गरी विभिन्‍न समुदाय र सम्प्रदायबीचको एकतालाई दरिलो बनाउनुका साथै राष्ट्रिय एकता सुदृढ गर्न मद्दत पुर्‍याउँदै आइरहेको चर्चा गरेका छन् ।

मुख्यमन्त्रीले तीज पर्वले समेत सबै जातजाति र समुदायबीच आपसी सद्‍भाव, सांस्कृतिक सहिष्णुता र सामाजिक एकता र समृद्ध नेपाल निर्माण गर्ने प्रेरणा सबैमा प्राप्त हुने विश्वास लिएको जनाएका छन् । “पितृसत्तात्मक समाजले महिलामाथि थुपारेको भेदभाव, असमानता र अत्याचारको विरुद्ध गीत सङ्गीतको माध्यमबाट आवाज बुलन्द गर्न तीज पर्वको महत्वपूर्ण भूमिका र चाडले दिदीबहिनी तथा दाजुभाइकोबीचमा सौहार्दपूर्ण सम्वन्ध कायम गरेको छ ।” मुख्यमन्त्री गुरुङले सन्देशमा भनेका छन् ।

कोभिड–१९ संक्रमण अझै पनि नहटेको हुँदा आवश्यक सुरक्षा र सजगता अपनाउन समेत उनले आग्रह गरेका छन् । रासस

प्रतिकृया लेख्नुहोस्:

सम्बन्धित शीर्षकहरु

आजको लोकप्रिय