scheduleमगलवारफाल्गुन १८ गते, २०७७

देउवाको चाहनाविपरित आन्दोलनमा घिसारिँदै कांग्रेस

काठमाडौँ, १३ माघ । नेपाली कांग्रेसले प्रतिनिधिसभा विघटनलगायतविरुद्ध आन्दोलनका थप कार्यक्रम सार्वजनिक गरेको छ । पार्टी सभापति शेरबहादुर देउवाको चाहनाविपरित पार्टीभित्र आन्दोलनको पक्षमा आक्रामकरुपमा आवाज उठेपछि बैठकले आन्दोलनको पक्षमा निर्णय लिएको हो ।

संसद पुनःस्थापनाको लागि संयुक्त आन्दोलनको कुरा उठेपनि देउवाकै कारण यो सम्भव हुन नसकेको आरोप लाग्ने गरेको छ । कांग्रेसकै कतिपय नेताहरुले देउवाले प्रधानमन्त्री केपी शर्मा ओलीलाई प्रतिगामी कदम चाल्न अनुमति दिएको आरोप सार्वजनिक कार्यक्रममा लगाउँदै आएका छन् ।

केन्द्रीय समितिको बैठक अगाडि पदाधिकारी बैठक भएको र बैठकमा वरिष्ठ नेता रामचन्द्र पौडेल र कृष्णप्रसाद सिटौलाले काठमाडौं केन्द्रित ठूलो कार्यक्रम गर्नुपर्नेमा जोड दिएका थिए । देउवाले भने कांग्रेसको महाधिवेशनको कार्यसूचि प्रभावित हुने तर्क गर्दै आन्दोलनका कार्यक्रमबाट पन्छिन चाहेका थिए ।

वरिष्ठ नेता पौडेलले बैठकमा सभापति देउवाको बोली र भूमिकाले बाहिर स्पष्ट सन्देश नगएको भन्दै आवाज उठाएका थिए । संसद विघटन असंवैधानिक हो भन्ने तर संसद पुनःस्थापनाको पक्षमा आन्दोलन नगर्ने द्विविधाले कांग्रेसलाई हित नगर्ने उनको तर्क थियो ।

कांग्रेसको आज बसेको केन्द्रीय कार्यसमितिको बैठकले यही माघ १९ गते पार्टीका भ्रातृ संस्था र माघ २४ गते शुभेच्छुक संस्थाले ७७ वटै जिल्लामा संयुक्त रुपले विरोध प्रदर्शन र विरोधसभाको आयोजना गर्ने निर्णय गरेको छ ।

यसैगरी आगामी फागुन ३ गते कांग्रेस जिल्ला कार्यसमितिहरुले जिल्ला सदरमुकाममा विरोध प्रदर्शन र सभाको आयोजना गर्ने निर्णय गरिएको कांग्रेस मुख्य सचिव कृष्णप्रसाद पौडेलले जानकारी दिए । केन्द्रबाट तोकिएका कार्यक्रमबाहेक जिल्ला कार्यसमितिलगायत पार्टीका विभिन्न निकाय र भ्रातृ एवं शुभेच्छुक संस्थाले विरोधका कार्यक्रम तय गरी सञ्चालन गर्ने बताइएको छ ।

कांग्रेसले यसअघि प्रतिनिधिसभा विघटनविरुद्ध गत पुस १३ गते १६५ संघीय निर्वाचन क्षेत्र, पुस २५ गते ३३० प्रदेशसभा निर्वाचन क्षेत्र, माघ ३ गते ७५३ पालिका र माघ ८ गते छ हजार ७४३ वडामा विरोध प्रदर्शन र सभा सम्पन्न गरिसकेको छ ।

प्रतिनिधिसभा विघटनविरुद्ध माघ १२ गते राजधानीमा नागरिक समाजले गरेको प्रदर्शनमा सरकारले बल प्रयोग गरेको भनी विरोध गर्दै बैठकले घाइते सबै आन्दोलनकारीको शीघ्र स्वास्थ्यलाभको कामना गरेको छ ।

यसैगरी प्रधानमन्त्रीले पछिल्लो समय सार्वजनिक रुपमा व्यक्त गरिरहेको अभिव्यक्ति पदको गरिमानुकूल नभएको पार्टीले जनाएको छ ।

बैठकले संसारको दोस्रो अग्लो हिमाल ‘के टु’ को सफल आरोहण गर्ने निर्मल पुर्जासहित दश नेपाली युवालाई उच्च सम्मानसहित विशेष बधाई ज्ञापन गरेको छ । बैठकले पार्टीको स्थानीय तह संगठन पुनर्संरचनाको समायोजन ७४ जिल्लामा पूरा गरी केन्द्रीय कार्यसमितिलाई गत पुस ३ गते लिखित जानकारी गराएकामा केन्द्रीय निर्वाचन समितिलाई धन्यवाद प्रकट गरेको छ ।

बैठकले पार्टी पदावधि समाप्त भएका भ्रातृ संस्था नेपाल महिला संघ, नेपाल तरुण दल, नेपाल विद्यार्थी संघ, नेपाल भूतपूर्व सैनिक संघ, नेपाल प्रजातन्त्र सेनानी संघ, नेपाल किसान संघ, नेपाल दलित संघ, नेपाल आदिवासी जनजाति संघ, राष्ट्रिय लोकतान्त्रिक अपांग संघ, नेपाल तामाङ संघ र नेपाल ठाकुर समाजको पदावधि समाप्त भएको मितिले ६ महिनाका लागि थप गर्ने निर्णय गरेको छ ।

विदेशस्थित पार्टीका नेपाली जनसम्पर्क समिति कतार, बहराईन, मलेसिया र साउदी अरबबाट पार्टीको विधान र नियमावलीबमोजिमको आवश्यक प्रक्रिया पुर्‍याई क्रियाशील सदस्यताको नयाँ र नवीकरणतर्फको नामावलीको सूची र सोबापतको सदस्यता शुल्कसमेत दाखिला हुन आएकाले सो सदस्यतालाई स्वीकृत गर्ने बैठकले निर्णय गरेको छ ।

कांग्रेसले प्रक्रिया पूरा गरी युरोपस्थित माल्टामा बसोबास गरिरहेका लोकतन्त्रवादी नेपालीको सक्रियतामा २०२० जनवरी २५ मा नेपाली जनसम्पर्क तदर्थ समिति गठन गरी आबद्धताका लागि निवेदनसहित आवश्यक कागजात पेश गरेकाले समितिलाई पार्टीसँगको आबद्धता प्रदान गर्ने निर्णय पनि गरेको छ ।

सभापति शेरबहादुर देउवाका सभापतित्वमा बसेको बैठकमा महामन्त्री पूर्णबहादुर खड्काले प्रस्तुत गरेका प्रस्ताव बैठकबाट सर्वसम्मत पारित भएको
थियो । बैठकमा वरिष्ठ नेता रामचन्द्र पौडेल र केन्द्रीय सदस्य नरहरि आचार्यले आमआफ्नो धारणा राखेका थिए ।

प्रतिकृया लेख्नुहोस्:
Prabhu_specian_saving
IME_Pay
Global IME

सम्बन्धित शीर्षकहरु

आजको लोकप्रिय

Mega_Bank
Ime_Pay