scheduleबिहिवारबैशाख ९ गते, २०७८

प्रधानमन्त्री ओलीले चिडियाखानामा रहेको गैंडाको पालन पाेषणकाे जिम्मा लिए

काठमाडौं, १९ फागुन । प्रधानमन्त्री केपी शर्मा ओलीले ललितपुरको जाउलाखेलस्थित सदर चिडियाखानामा संरक्षित गैंडाका लागि अभिभावकत्व ग्रहण गर्दै एक महिनाको खाना खर्च निजी खर्चबाट व्यहोर्ने भएका छन् । राष्ट्रिय प्रकृति संरक्षण कोषले सदर चिडियाखाना व्यवस्थापन गरेको रजत महोत्सव तथा विश्ववन्यजन्तु दिवसका अवसरमा प्रधानमन्त्री ओलीले यस्तो घाेषणाा गरेका हुन् ।

प्रधानमन्त्री ओलीले चिडियाखानामा राखिएका जनावरका लागि सरकारले वर्षभरीको खाना खर्च व्यहोर्दै आएको र आफूले एक महिनाका लागि गैँडाको खाना खर्च व्यहोर्ने घोषणा गरेका हुन् । उनले भने, ‘प्रधानमन्त्रीका हैसियतले आफूले सरकारबाट पाउने रकम वर्षभरीको सबै कोरोना संक्रमण कोषमा दिएकाले श्रीमती राधिका शाक्यको निवृत्तिभरणबाट आउने रकमबाट गैँडाका लागि एक महीनाको खाना खर्च दिनेछौँ ।’

प्रधानमन्त्री ओलीले सदर चिडियाखाना सानो भएकाले आगामी दिनमा वन्यजन्तुको उद्धार तथा वन्यजन्तुको परस्थानीय संरक्षण, वैज्ञानिक अध्ययन अनुसन्धान तथा पर्या–पर्यटन अभिवृद्धिका लागि भक्तपुरको सूर्यविनायकमा बृहत् खालको चिडियाखाना निर्माणका लागि मन्त्रिपरिषद्बाट स्वीकृत भई निर्माण प्रक्रिया अघि बढेको बताए । वन तथा वातावरण मन्त्रालयले सोका लागि विस्तृत परियोजना प्रतिवेदन (डिपिआर) तयार गर्दैछ ।

प्रधानमन्त्री ओलीले जावलाखेलको चिडियाखाना अवलोकन गर्नका लागि आउने ज्येष्ठ नागरिक, गर्भवती महिला अपाङ्गता भएका तथा बालबालिकालाई हिँडडुल गरी वन्यजन्तु अवलोकन गर्न समस्या हुने भएकाले यसका लागि सरकारका तर्फबाट चार वटा विद्युतीय बहान (रिक्सा) उपलब्ध गराउन वन तथा वातावरण मन्त्रालयलाई आवश्यक समन्वय गरी प्रक्रिया अगाडि बढाउन आग्रह तथा निर्देशन दिए ।

प्रधानमन्त्री ओलीले विगतमा सदर चिडियाखाना मनोरञ्जनका उद्देश्यले तत्कालीन प्रधानमन्त्री जुद्धशमशेर राणाले स्थापना गरेको भए तापनि हाल यसको उद्देश्य फराकिलो हुँदै गएको र चिडियाखाना मनोरञ्जन मात्रै नभई अध्ययन अनुसन्धनका लागिसमेत महत्वपूर्ण आधार रहेको बताए ।

वन तथा वातावरणमन्त्री प्रेमबहादुर आलेले कोभिड–१९ का कारण चिडियाखानाको आम्दानी घट्न गई यसकोे व्यवस्थापनमा परेको समस्या समाधानका लागि अर्थ मन्त्रालयसँग आवश्यक बजेट व्यवस्थापनका लागि अनुरोध गरिएको बताए ।

मन्त्री आलेले जैविक विविधता संरक्षणमा राष्ट्रिय प्रकृति संरक्षण कोषले महत्वपूर्ण योगदान गरेको जनाउँदै वर्तमान सदर चिडियाखानाको व्यवस्थापनमा परेको समस्या समाधानार्थ आजैदेखि थालनी गरिएको जानकारीसमेत दिए । कोषका सदस्यसचिव शरद अधिकारीले प्रकृति तथा वन्यजन्तु संरक्षणमा भएका प्रयास र चुनौतीबारे अवगत गराए । रासस

प्रतिकृया लेख्नुहोस्:
Prabhu_specian_saving

सम्बन्धित शीर्षकहरु

आजको लोकप्रिय

Mega_Bank
Ime_Pay