मेडिकल साइन्सको पढाई नेपालमै व्यवस्थित गर्ने विषयमा शिक्षामन्त्री पौडेलद्वारा छलफल

साझापोस्ट

१३ वैशाख, काठमाडौं । मेडिकल साइन्सको पढाइ नेपालमै व्यवस्थित र स्तरीय बनाउने विषयमा शिक्षामन्त्रालयले छलफल थालेको छ ।

मंगलबार चिकित्सा शिक्षा, त्रिभुवन विश्वविद्यालय शिक्षण अस्पताल, काठमाडौं विश्वविद्यालय, पूर्वाञ्चल विश्वविद्यालय, संस्कृत विश्वविद्यालयलगायतका पदाधिकारीसँगको छलफलमा शिक्षा, विज्ञान तथा प्रविधि मन्त्री देवेन्द्र पौडेलले मेडिकल साइन्सको पढाई नेपालमै व्यवस्थित र स्तरीय बनाउने विषयमा छलफल गरेका हुन् ।

मेडिकल शिक्षा आर्जनका लागि वर्षेनी ९८ अर्ब रुपैयाँ देश बाहिर गइरहेको बताउँदै नेपालमै व्यवस्थित र स्तरीय बनाउनुपर्नेमा मन्त्री पौडेलले जोड दिए । ‘देशमा मेडिकल शिक्षा पढ्ने विद्यार्थीको आकर्षण बढ्ढो छ, मन्त्री पौडेलले भने, ‘देश बाहिर पढ्न गएकाहरु नेपालमा आएर परीक्षा दिई डाक्टर बनिरहेका छन् । उनीहरुलाई नेपालमै पढ्ने र परीक्षा दिने व्यवस्था गरौं ।’

देशमा पढ्ने व्यवस्था मिलाएर शिक्षा प्राप्तिका लागि बाहिरिने रकम नेपालमै रहने उनको भनाई थियो । मन्त्री पौडेलले कागजमा दक्षजनशक्ति प्रर्याप्त देखिए पनि फिल्डमा नभएको बताए ।
‘अवसरमा प्रतिस्पर्धा गर्ने दायरा बढाइ गुणस्तरिय शिक्षामा ध्यान दिइयो भने मात्रै उत्पादित जनशक्ति बेरोजगार बस्नु नपर्ने उनको भनाई थियो । ‘शिक्षालाई नियमन गरौं भन्दा हामी खुम्चिएका छौं, मन्त्री पौडेलले भने, ‘केही ऐन र कानूनको जटिलताले गर्दा सिमित बाहेकले देशमा पढ्न पाउने अवसर गुमाइरहेका छन् ।’
छलफलमा सहभागिले मेडिकल क्षेत्रमा बजेट कमहुँदा धेरै समस्या आएको बताउँदै बजेट बढाउन मन्त्रीलाई आग्रह गरेका थिए ।