काठमाडौँ । नेकपा(एकीकृत समाजवादी) ले स्थानीय तह निर्वाचनमा पार्टीबाट जितेका जनप्रतिनिधिलाई एक साताभित्र सम्पत्ति विवरण सार्वजनिक गर्न निर्देशन दिएको छ ।
महासचिव बेदुराम भुसालले बुधबार सर्कुलर जारी गर्दै पार्टीका तर्फबाट उम्मेदवार बनेर जितेकाहरूलाई जेठ १७ गतेसम्म सम्पत्ति विवरण सार्वजनिक गर्न निर्देशन गरेका हुन् ।
जनताले ठूलो विश्वास गरी मत दिएकाले जनताको विश्वासप्रति सधैँ इमानदार रहन समाजवादीले आफ्ना जनप्रतिनिधिलाई भनेको छ । ‘जनताको हितलाई केन्द्रबिन्दुमा राखेर काम गर्नुहोला। निर्वाचनका बेला जनसमक्ष गरेको वाचालाई कहिल्यै नभुल्नुहोला । ' सर्कुलरमा भनिएको छ।
एमालेबाट फुटेर बनेको एकीकृत समाजवादी यसपालि पहिलो पटक निर्वाचनमा सहभागी भएको हो। सत्ता गठबन्धनमा रहेको समाजवादीले पोखरा महानगरपालिका र हेटौंडा उपमहानगरपालिकाको मेयर जितेको छ। यो पाटीबाट देशभर प्रमुख पदमा २० जना र उपप्रमुख पदमा २४ जना जनप्रतिनिधि निर्वाचित भएका छन् ।
सम्पत्ति विवरण सार्वजनिक गर्ने कामको अनुगमन गर्न सम्पूर्ण जिल्ला कमिटीलाई पनि निर्देशन गरिएको छ ।
एकीकृत समाजवादीले काूनको परिधिमा रहन, भ्रष्टाचार र निजी स्वार्थबाट मुक्त रहन पनि भनेको छ । ‘ऐन तथा कानुनहरूको परिधिमा रहेर इमान्दारीता र कर्तव्य निष्ठाताका साथ जनताको सेवा गर्नुहोला । ' सर्कुलरमा भनिएको छ– निजी स्वार्थ, अनिमियतता र भ्रष्टाचारबाट मुक्त रहदै स्वच्छ एवं सादा जीवन शैली र असल आचरणको अवलम्बन गर्नुहोला । सम्बन्धित पार्टी कमिटीका निर्णय र निर्देशनको पालना गर्नुहोला ।’