काठमाडौं । दसैँ सकिएर तिहार, छठलगायत पर्व नजिकिँदै छन् । मुख्य पर्यटकीय मौसम पनि चलिरहेको छ । यो माहोललाई थप रौनक बनाउन मौसम खुलेसँगै राजधानी काठमाडौँ उपत्यका वरिपरि देखिने मनमोहक दृश्यले थप उल्लासमय बनाएको छ।
करिब दुई साताको लगातार वर्षा पछि नेपालबाट मनसुन बाहिरिएको छ । मौसम खुलेपछि उपत्यकाका डाडाँ र उत्तरी क्षेत्रमा देखिने हिमश्रृङ्खलाले शरद ऋतुको मौसमलाई थप मनमोहक तुल्याएको छ।
मौसमखुलेसँगै उपत्यका आसपास र प्रमुख गन्तव्यमा आन्तरिक तथा विदेशी पर्यटकको चहलपहल बढेको छ । पछिल्ला दिनमा काठमाडौँलगायत देशभर मौसम सफा रही आकाश खुलेको छ । आकाश खुलेर पारिलो घाम लागेपछि काठमाडौंबाट देखिने हिमालहरु टल्ककै टल्केका छन् ।
चार दिनयता उपत्यकाको मौसम खुलेकाले धुलिखेल, नगरकोट, चन्द्रागिरी, जरसिंहपौवा, सुन्दरीजल, शिवपुरी, चोभारलगायत स्थानको रौनकता थप सुन्दर बनेको छ ।