काठमाडौं । प्रतिनिधिसभा सदस्य निर्वाचन अन्तर्गत कांग्रेससँगको गठबन्धन गरेको सत्तारुढ दल माओवादी केन्द्रलाई यो पटक गठबन्धन फापेन । पाँचदलीय गठबन्धनको भागबण्डामा ४४ सिट पाएको माओवादीले अहिलेसम्म जम्मा १७ स्थानमा मात्र जित निकालेको छ ।
तीन स्थानमा मतगणना सुरु हुन सकेको छैन । अहिलेसम्म १५६ क्षेत्रको अन्तिम नतिजा सार्वजनिक हुँदा माओवादी केन्द्र दुईवटा प्रदेशमा शून्य भएको छ। मधेश र सुदूरपश्चिम प्रदेशमा प्रतिनिधित्वविहीन अर्थात शुन्य भएको छ । गठबन्धन गरेर प्रतिनिधिसभा तर्फ मधेश प्रदेशमा ८ जिल्लाका ३२ सिट मध्ये ६ ठाउँमा उम्मेदवारी दिएको माओवादीले एउटा पनि जित्न सकेन् । उसका दुई जना पदाधिकारी उपमहासचिव गिरिराजमणि पोखरेल र मात्रिका यादव पराजित भए ।
मधेशका ८ जिल्लाका ३२ मध्ये ३१ निर्वाचन क्षेत्रको मत परिणाम सार्वजनिक हुँदा माओवादी केन्द्रका सबै उम्मेदवार पराजित भएका छन् । धनुषा क्षेत्र नम्बर ४ मा मतगणना सकिएको छैन। त्यहाँ कांग्रेस उम्मेदवारले अग्रता कायम राखेका छन्।
पाँच दलीय गठबन्धनमा रहेका माओवादी केन्द्रले सिरहा ३ मा विश्वनाथ साह, धनुषा १ मा मातृकाप्रसाद यादव, महोत्तरी १ मा गिरिराजमणि पोखरेल, सर्लाही ३ मा नरेन्द्र साह कलवार, र बारा २ मा शिवचन्द्र प्रसाद कुशवाहालाई उम्मेदवार बनाएको थियो । तर कसैले जित निकाल्न सकेनन् ।
गोलाकार भित्रको हसियाँ हथौडा चुनाव चिन्हमा महिन्द्र राय यादवले सर्लाही २ बाट एक सिट जितेका छन, तर उनी नेपाल समाजवादी पार्टीका अध्यक्ष हुन् ।रौतहट ३ मा माओवादीले आफ्ना आधिकारिक उम्मेदवार रवीन्द्र पटेललाई कारवाही गरी एमाले छोडेको प्रभु साहलाई समर्थन गरेको थियो । र, उनले त्यहाँ चुनाव जितेका छन । २०७४ को निर्वाचनमा माओवादी केन्द्रले मधेस प्रदेशका ५ वटा निर्वाचन क्षेत्रमा जितेकाे थियो ।
अघिल्लो निर्वाचनमा सुदूरपश्चिम प्रदेशमा माओवादीले प्रतिनिधिसभामा ३ सिट जितेको थियो । तर यो पटक गठबन्धन गरेको माओवादी प्रदेश मै शून्य भयो । उसले प्रतिनिधिसभामा कैलाली २ र ३, कञ्चनपुर १ र बैतडीमा उम्मेदवारी दिएको थियो ।
हाल मतगणना अनिश्चित रहेको बाजुरामा कांग्रेसबाट सहमहामन्त्री बद्री पाण्डे र नेकपा एमालेबाट पूर्वमन्त्री कर्ण थापाबीच चुनावी प्रतिस्पर्धा छ।