काठमाडौं । काठमाडौंमा चिसो बढ्दो छ । तर चिसोलाई कतारमा चलिरहेको विश्वकप फूटबलले बिर्साईदिएको छ । नेपालमा पनि फिफा विश्वकप हेर्न होटल, रेष्टुराँहरु राति प्रायः बुक हुने गरेका छन् । सडकमै प्रोजेक्टर राखेर विश्वकप हेर्ने जमात पनि कम छैन । रातभर जागा बसेर भएपनि समर्थकहरु मन परेको टिमकाे खेल हेर्न छुटाउँदैनन् । घरमा ल्यापटप, कम्प्युटर, मोबाइलमा हेर्नुभन्दा कतै नजिकको होटलमा गएर प्रोजेक्टरमा खेल हेर्नुको मज्जा नै बेग्लै हुन्छ । त्यसैले पनि होला आजभोलि काठमाडौं उपत्यकाका विभिन्न होटलहरु राति पर्यटकहरुले होइन,विश्वकप हेर्नेहरुले भरिभराउ देखिन्छन् । होटलमै पार्टी, होटलमा नै रमाइलो साथमा विश्वकपको मज्जा लिन युवा चुक्दैनन् । होटलहरुले पनि विश्वकपका लागि छुट्टै प्याकेज निकालेका छन् । यतिबेला होटलमा मात्रै विश्वकप सिमित भने छैन । जाडोमा घरको आँगनमै नै प्रोजेक्टर राखेर हेर्नेहरु पनि छन् । तस्बिर: न्यूज एजेन्सी नेपाल
