काठमाडौं । निर्वाचन आयोगले आज राति १२ बजेसम्म समानुपातिकतर्फको मत गणना सक्न सम्बन्धित निर्वाचन अधिकृतहरूलाई निर्देशन दिएको छ । मंसिर ४ मा भएको निर्वाचनमा प्रत्यक्षतर्फको नतिजा आइसकेपनि समानुपातिकतर्फ तीन जिल्ला (स्याङजा, बाजुरा र दोलखाको मत गणना जारी रहेकाले आज राती १२ बजेसम्म सक्न निर्देशन दिएको हो ।
निर्वाचन आयोगले नतिजासहितको प्रतिवेदन प्रमाणीकरणका लागि मंसिर २८ गतेसम्म राष्ट्रपतिलाई बुझाउने बताएको छ । त्यसका लागि आयोगले दलहरुलाई समानुपातिकतर्फ निर्वाचित हुने नाम तीन दिनभित्र पठाउन समय दिने भएको छ । दलहरुलाई ७ दिनको समय दिन मिल्ने भएपनि छिटो गर्नका लागि तीन दिनकोसमय दिने प्रमुख निर्वाचन आयुक्त दिनेशकुमार थपलियाले बताए ।
प्रत्यक्ष तर्फ सबै क्षेत्रको नतिजा सार्जनजिक भइसकेको छ । प्रतिनिधि सभाका १६५ निर्वाचन क्षेत्रमध्ये ५७ क्षेत्रमा जितेर नेपाली कांग्रेस प्रत्यक्षतर्फ पहिलो पार्टी बनेको छ । नेकपा एमालेले ४४ निर्वाचन क्षेत्रमा जितेर दोस्रो बनेको छ ।
त्यसैगरी प्रत्यक्षमा नेकपा माओवादी केन्द्रले १८ सिट जितेर तेस्रो पार्टी बन्दा नेकपा एकीकृत समाजवादीले भने १० सिट जितेर चौथो दल बनेको छ । जनता समाजवादी पार्टी, राष्ट्रिय प्रजातन्त्र पार्टी र राष्ट्रिय स्वतन्त्र पार्टीले समान सात सात क्षेत्र जितेका छन् ।
लोकतान्त्रिक समाजवादी पार्टीले र नागरिक उन्मुक्ति पार्टीले चार चार क्षेत्रमा जित हासिल गरेको छ । राष्ट्रिय जनमोर्चा, नेपाल मजदुर किसान पार्टी र जनमत पार्टीले एक एक सिट जितेका छन् । देशभर ५ जना स्वतन्त्र सांसद निर्वाचित भएका छन् ।
प्रदेशसभाको प्रत्यक्षतर्फ ३३० वटा प्रदेश सभाका क्षेत्रमध्ये १११ निर्वाचन क्षेत्रमा नेपाली काँग्रेस ठट्ठलो दल बनेको छ । ९१ सिट जितेर एमाले दोस्रो, ५३ स्थानमा जितेर माओवादी केन्द्र तेस्रो दल बनेको छ । त्यसैगरी नेकपा एकीकृत समाजवादीले १५ सिट जितेको छ भने जनता समाजवादी पार्टीले ११ राष्ट्रिय प्रजातन्त्र पार्टीले पनि ११, लोकतान्त्रिक समाजवादी पार्टीले ९, नागरिक उन्मुक्ति पार्टीले ७, जनमत पार्टीले पनि ७, हाम्रो नेपाली पार्टीले १ र स्वतन्त्रले १२ वटा निर्वाचन क्षेत्रमा जितेका छन् ।
