काठमाडौं । सुकुम्बासीमाथि काठमाडौं महानगरपालिकाले धरपकड गरेको भन्दै त्यसको विरोधमा सोमबार काठमाडौंमा प्रदर्शन भएको छ । संयुक्त राष्ट्रिय सुकुम्बासी मोर्चा नेपाल र नेपाल महिला एकता समाजले काठमाडौंमा प्रदर्शन गरेको हो ।

सुकुमबासी तथा अव्यवस्थित बसोबासीहरुले विना विकल्प उठिबास गराउन नपाइने माग गरेका छन् । प्रदर्शनकारीले थापाथलीस्थित सुकुम्बासी बस्तीमा काठमाडौं महानगरपालिकाले डोजर चलाउन खोज्दा आक्रमण गर्नेहरुमाथि महानगरले दिएको जाहेरी फिर्ता लिन पनि माग गरेका छन् ।

माइतीघबाट सुरु भएको उनीहरुको दबाबमूलक र्‍याली बानेश्वरमा पुगेर कोणसभामा परिणत भएको थियो । विभिन्न नारासहितका प्लेकार्ड बोकेका उनीहरुले के सहर गरिबको पनि होइन र ? नागरिकको अधिकार खोइ ? उठिबासको त्रास कहिलेसम्म जस्ता नारा लेखेका प्लेकार्ड बोकेका थिए । 

थापाथलीस्थित वाग्मती नदी किनारमा रहेको सुकुम्बासी बस्तीमा काठमाडौं महानगरपालिकाले डोजर लिएर गएपछि महानगरका कर्मचारीसँग झडप भएको थियो । झडपमा केही महानगर प्रहरी घाइते भएका थिए ।