
काठमाडौं । प्रतिनिधिसभा सदस्यहरुलाई संघीय संसद सचिवालयले दुई दिने तालिम दिँदैछ । सचिवालयले आज र भोली दुई दिन अभिमुखीकरण तालिम दिन लागेको हो ।
अभिमुखिकरण तालिममा संसदीय अभ्यास, संसदीय प्रणली, बजेट निर्माण प्रकृया र कानून निर्माण जस्ता कुरा सिकाइने सचिवालयका सचिव डाक्टर रोजनाथ पाण्डेले जानकारी दिए।
तालिम विहान ११ बजेदेखि ४ बजेसम्म संघीय संसद भवन नयाँ बानेश्वरको लोत्से हलमा हुनेछ। अभिमुखि कार्यक्रममा विभिन्न क्षेत्रका विज्ञहरुलाई समेत बोलाइएको सचिव पाण्डेले जानकारी दिए।
पाण्डेका अनुसार, डाक्टर युवराज खतिवडाले बजेट निर्माण, योजना र त्यसमा सांसदहरुको भूमिका बारे सिकाउनेछन्। यसै गरी नीति प्रतिष्ठाका अध्यक्ष डाक्टर विष्णुराज उप्रेतिले सार्वजनिक नीतिको बारेमा सांसदहरुलाई अभिमुखीकरण तालिम दिनेछन्।
यस्तै डाक्टर खिमलाल देवकोटाले समितिमा सांसदहरुको भूमिका, कानून आयोगका पूर्व अध्यक्ष माधव पौडेलले कानून निर्माणका बारेमा सांसदहरुलाई जानकारी गराउनेछन् ।
पूर्व उपसभामुख पुष्पा भुसाललले शून्य समयको बारेमा सांसदहरुलाई सिकाउने कार्यक्रम रहेको छ। यस्तै संविधान सभाका अध्यक्ष सुवास नेम्बाङले प्रभावकारी संसद अभ्यासका बारेमा सांसदहरुलाई अवगत गराउनेछन्।
यस्तै सचिवालयका सचिव डाक्टर रोजनाथ पाण्डेले सचिवालयको सेवा प्रवाहको बारेमा सांसदहरुलाई प्रष्ट पार्नेछन्। प्रतिनिधिसभामा अधिकांश नयाँ अनुहार आएकोले सचिवालयले सांसदहरुलाई अभिमुखीकरण तालिम दिन लागेको हो।