काठमाडौं । सुदूरपश्चिम प्रदेश सभाको बैठक ३ घण्टा पछि सरेको छ। दिउँसो १ बजेका लागि बोलाइएको बैठक दिउँसो ४ बजेका लागि सारिएको हो।
आजको बैठकमा मुख्यमन्त्री राजेन्द्र सिंह रावलले विश्वासको मत लिने कार्यसूची छ। रावलले विश्वासको मत लिने आज अन्तिम दिन हो । आज विश्वासको मत नपाए मुख्यमन्त्री रावल स्वतः पदमुक्त हुनेछन् ।
नागरिक उन्मुक्ति पार्टीका सांसदले विश्वासको मत नदिने बताएर संकटमा परेपछि बैठक ३ घण्टा पर सारिएको हो । ३ बजे प्रधानमन्त्री निवास बालुवाटारमा उच्च स्तरीय राजनीतिक संयन्त्रको बैठक भएकाले उक्त संयन्त्रले निकास निकाल्ने आशमा बैठक सारिएको हो ।
जेलमा रहेका नाउपाका संरक्षक रेशम चौधरीको रिहाइलाई मुख्य सर्त बनाएर नाउपाले विश्वासको मत दिन मानिरहेको छैन । सर्त पूरा नभएको भन्दै नाउपाका ७ जना सांसद काठमाडौंमै छन् । संयन्त्रले उसका माग सम्बोधन गर्ने लिखित सहमति जनाए आजै कैलाली पुगेर विश्वासको मत दिने नाउपाका सांसदको तयारी छ ।