काठमाडौं । नेकपा एमालेका अध्यक्ष केपी शर्मा ओलीले अहिलेको सत्ता गठबन्धन वैशाखमा टुट्ने र प्रधानमन्त्री पुष्पकमल दाहाल प्रचण्डले सरकार छोड्नु पर्ने बताएका छन ।
प्रतिनिधिसभाको बैठकमा गठबन्धन टुट्ने बेलामा एमाले अध्यक्ष केपी शर्मा ओलीसँग भएको सम्वाद प्रचण्डले प्रतिनिधिसभा बैठकमा सुनाउँदै यो विषय जानकारी गराएका छन ।
एमालेसँगको गठबन्धन टुट्नु अघिको अन्तिम छलफलमा आफूले दुबै जना मिलेर कांग्रेसलाई राष्ट्रपति दिने प्रस्ताव राख्दा ओलीले अस्वीकार गरेको र नयाँ गठबन्धन बनेपनि प्रचण्ड वैशाख भन्दा पछि प्रधानमन्त्री नरहने ओलीले बताएको प्रचण्डले बैठकमा सुनाए ।
‘उहाँले मलाई पटक–पटक तपाईं वैशाखभन्दा उता जानुहुन्न । वैशाखमा राष्ट्रपतिको बायाँ पट्टी लविमा तपाई र म एकै ठाउँमा हुन्छौं भन्नुभएको छ ।’ ओलीले आफूलाई धेरै ठूलो शिक्षासमेत दिएर पठाएको भन्दै प्रचण्डले भने ,उहाँको भनाइलाई पुष्टि गर्ने कि फेल गर्ने हाम्रो हातमा छ ।’ प्रचण्ड प्रधानमन्त्रीबाट हट्ने र पूर्वप्रधानमन्त्रीको लहरमा आफूसँगै बस्न आइपुग्ने ओलीको भनाइ थियो । एमाले नेताहरुले पनि सार्वजनिक रुपमै कांग्रेसका सभापति शेरबहादुर देउवालाई प्रधानमन्त्री बनाउन आफूहरुले सघाउने बताउँदै आएका छन् ।
आइतबार विश्वासको मत लिने प्रधानमन्त्री प्रचण्डको प्रस्तावमाथि भएको छलफलमा भाग लिँदै एमाले उपाध्यक्ष विष्णु पौडेलले पनि डेढ २ महिनामै फेरि विश्वासको मत लिने अवस्था आउन सक्ने बताएका थिए ।
