धनगढी । कैलालीको जोशीपुर गाउँपालिकामा ट्रयाक्टर दुर्घटना हुँदा दुई जनाको मृत्यु भएको छ। २८ जना घाइते भएका छन्।
गएराति जिल्लाको जोशीपुर गाउँपालिका–७ हजारीबारा भन्ने स्थानमा ट्रयाक्टर दुर्घटना भएको हो। बर्दगोरिया गाउँपालिका ६ सुगरखालमा आफन्तको घरमा पास्नी भोज खाएर भजनी नगरपालिका ९ कुणीतर्फ फर्किने क्रममा ट्रयाक्टर दुर्घटनामा परेको प्रहरीले जनाएको छ।
जिल्ला प्रहरी कार्यालय कैलालीका प्रहरी नायव उपरीक्षक कूलदीप चन्दका अनुसार अनियन्त्रित भएर ट्रयाक्टर पल्टिदा ट्रयाक्टरमा सवार दुई जनाको मृत्यु भएको र २८ जना घाइते भएका हुन्। मृत्यु हुनेमा भजनी ९ की चाहाना चौधरी र दिलरानी चौधरी रहेका छन्। उनीहरूको घोडाघोडी अस्पतालमा उपचारको क्रममा मृत्यु भएको हो।
सुरज चौधरीले चलाएको से १ त ८८७० नम्बरको ट्रयाक्टर अनियन्त्रित भई दुर्घटना भएको हो। प्रहरीले ट्रयाक्टर नियन्त्रणमा लिएको छ भने फरार रहेका ट्रयाक्टर चालकको खोजी गरिरहेको छ।