सिएमजे स्पिरिट अफ क्रिकेट अवार्ड–२०२२ नेपाली राष्ट्रिय क्रिकेट टोलीका ओपनर आसिफ शेखले जितेका छन् । मेरिलेबोन क्रिकेट क्लब (एमसिसी) ले प्रदान गर्ने यस अवार्ड जित्ने क्रममा आसिफले इङ्ल्यान्डका बेन स्टोक्स र जस बटलरलाई पछि पारे ।
गत वर्ष फागुनमा ओमानमा भएको चार देश सम्मिलित टी–२० सिरिजमा आयरल्यान्डविरुद्ध आसिफले देखाएको खेल भावनाको कदर गदै उनलाई यो अवार्ड प्रदान गरिएको हो ।
आसिफले आयरल्यान्डका एन्डी म्याकबर्नी रन लिनेक्रममा लड्न पुगेपछि रन आउट गरेका थिएनन् । आसिफको उक्त निर्णयलाई त्यतिवेलै संसारभरका क्रिकेट प्रेमीले प्रशंसा गरेका थिए । एमसिसीले सिएमजे स्प्रिरिट क्रिकेट अवार्ड २०१३ देखि प्रदान गर्दै आएको छ ।
यसअघि आसिफलाई अन्तर्राष्ट्रिय क्रिकेट परिषद् (आईसीसी) ले पनि प्रतिष्ठित ‘आईसीसी स्पिरिट अफ क्रिकेट अवार्ड’ (खेल भावना अवार्ड) प्रदान गरेको थियो ।