काठमाडौं । तिब्बतीलाई नेपाली नागरिकता बनाइदिने गिरोह पक्राउ परेको छ। प्रतिव्यक्ति ३ देखि ५ लाख रुपैयाँ लिएर नेपाली नागरिकता बनाइदिने गिरोह पक्राउ परेको प्रहरीले जनाएको छ।
प्रक्राउ पर्नेमा काठमाडौं बबरमहलका न्युल्केश श्रेष्ठ, ललितपुर गोदावरीका विजय लामा, झापा कचनकवलका कृष्णबहादुर कटवाल, मोरङ सुन्दर हरैंचाका हिरालाल शिवाकोटी, तनहुँ शुक्लगण्डकीका लोप्साङ थिन्ले छन्।
काठमाडौं उपत्यका अपराध अनुसन्धान कार्यालयको टोलीले उनीहरूलाई बबरमहलबाट प्रक्राउ गरेको हो। अपराध महाशाखाका प्रवक्ता सोमेन्द्र सिंह राठौरका अनुसार उनीहरूको समूहले प्रतिव्यक्ति ३ देखि ५ लाख रुपैयाँ लिएर तिब्बती नागरिकलाई नेपाली नागरिकता बनाउने कार्यमा संग्लन थिए।
अहिलेसम्म यो टोलीले १० जना तिब्बती नागरिकलाई नेपाली नागरिकता बनाइदिएको जानकारी पाएको सिंहले बताए ।
