काठमाडौं । नेपालमा अझै पनि आधाभन्दा बढी जनसंख्याले खाना पकाउन दाउराको प्रयोग गर्ने गरेका छन् । शुक्रबार सार्वजनिक राष्ट्रिय जनगणना–२०७८ अनुसार देशका कुल परिवारमध्ये आधा भन्दा बढी (५१ प्रतिशत) परिवारले खाना पकाउन काठ/दाउरा प्रयोग गर्ने गरेको खुलेको हो । तर पहिले भन्दा यो घटेको छ । राष्ट्रिय जनगणना २०६८ अनुसार ६४.० प्रतिशतले खाना पकाउन अक्सर दाउरा प्रयोग गर्ने गरेका थिए ।
खाना पकाउन एल.पी.ग्याँस, बिजुली, गुइँठारगोरहा, बायोग्यास, मट्टितेल र अन्य इन्धन प्रयोग गर्ने परिवारको प्रतिशत क्रमशः ४४.३, ०.५, २.९, १।२, ०.०५ र ०.१ छ । अघिल्लो जनगणनाको तथ्यांकको तुलनामा यस पटक दाउरा प्रयोग गर्नेको संख्या १३ प्रतिशतले घटेको हो ।
नेपालको कुल जनसंख्या भने २ करोड ९१ लाख ६४ हजार ५ सय ७८ .छ । जनगणनाले धेरैजसो घरपरिवारले आफू बसोबास गरेको घर/आवासीय एकाइमा बत्ती बाल्न अक्सर बिजुली प्रयोग गर्ने गरेकाे पाइएकाे छ ।
गत जनगणनामा बिजुली प्रयोग गर्ने परिवार ६७।३ प्रतिशत प्रतिशत रहेकोमा हाल सो अंशमा उल्लेख्य वृद्धि भई ९२।२ प्रतिशत पुगेको छ । बत्ती बाल्नका लागि अक्सर सोलार/सौर्य ऊर्जा, मट्टितेल र अन्य इन्धन प्रयोग गर्ने परिवार क्रमशः ६.६, ०.६, र ०.६ प्रतिशत छन् । २०६८ मा बत्ती बाल्नका लागि मट्टितेल, सोलार र अन्य इन्धन प्रयोग गर्ने परिवार क्रमशः १८.३, ७.४ र ६.१ प्रतिशत थियो ।
