दाङ । लुम्बिनी प्रदेश सरकारबाट नेकपा नेकपा माओवादी केन्द्र बाहिरिएको छ । माओवादीले सरकारलाई दिएको समर्थन पनि फिर्ता लिएको छ ।
आइतबार माओवादी केन्द्रबाट मन्त्री बनेका तीनैजनाले मुख्यमन्त्री लीला गिरिसमक्ष राजीनामा बुझाएर सरकारबाट बाहिरिएका हुन् । लुम्बिनी सरकारमा माओवादी केन्द्रका जोखबहादुर महरा, इन्द्रजित चौधरी र कृष्णा केसी गरी ३ जना सहभागी थिए ।
माओवादी सरकारबाट बाहिरिएसँगै उसले सरकारलाई दिएको समर्थन पनि फिर्ता लिएको छ । अब मुख्यमन्त्री गिरीले ३० दिनभित्र विश्वासको मत लिनुपर्नेछ ।
८७ सदस्यीय प्रदेशसभामा नेकपा एमालेका २९, नेपाली कांग्रेसका २७, माओवादी केन्द्रका ११, नागरिक उन्मुक्ति पार्टी र राप्रपाका ४, ४, जसपा, लोसपा र जनमत पार्टीका ३, ३, स्वतन्त्र, एकीकृत समाजवादी र राष्ट्रिय जनमोर्चाका एक एक जना प्रदेशसभा सदस्य रहेका छन् । प्रदेशसभामा बहुमत जुटाउन ४४ सांसदको समर्थन आवश्यक पर्छ ।
माओवादीले विश्वासको मत फिर्ता लिएर सरकारबाट बाहिरिए सँगै मुख्यमन्त्री लिला गिरीको सरकार संकटमा पर्ने देखिएको छ । केन्द्रमा बनेको गठबन्धनको प्रभाव प्रदेशमा परेको हो । केन्द्रमा सत्ता गठबन्धन बाहिर रहेका एमाले र राप्रपा मिल्दा पनि गिरीको सरकार सुरक्षित हुँदैन । त्यहाँ माओवादी वा कांग्रेस कस्को नेतृत्वमा सरकार बनाउने टुंगो लागिसकेको छैन ।
५८ जना प्रदेश सभा सदस्यको हस्ताक्षरसहित पुष २७ गते मुख्यमन्त्री बनेका गिरीले माघ ५ गते विश्वासको मत लिएका थिए ।