काठमाडौं । अर्जेन्टिनी फरवार्ड लियोनल मेस्सीले अन्तर्राष्ट्रिय खेलमा सयौं गोल पुरा गरेका छन् । बुधवार विहान भएको खेलमा कुराकाओलाई अर्जेन्टिनाले ७–० ले हराउँदा मेस्सीले सयौं अन्तर्राष्ट्रिय गोल गरेका हुन ।
यो खेलमा उनले ह्याट्रिक गरे । अन्तर्राष्ट्रिय खेलमा मेस्सीको गोल संख्या १०२ पुगेको छ । मेस्सी सय गोल पुरा गर्ने तेस्रो खेलाडि हुन । उनीभन्दा अघि पोर्चुगलका क्रिष्टियानो रोनाल्डोको १२२ र इरानका अली दाईको १०९ गोल छ । अलि दाइले सन्यास लिईसकेका छन भने रोनाल्डो अहिले पनि खेलिरहेका छन ।
मेस्सीको ह्याट्रिक मद्दतमा अर्जेन्टिनाले कुराकाओमाथि ७–० को फराकिलो जित दर्ता गरेको हो । अर्जेन्टिनाको जितमा मेस्सीले ह्याट्रिकसँगै निकोलस गोन्जालेज, एन्जो फर्नान्डेज, एन्जल डि मारिया र गोन्जालो मोन्टिएलले समान एक गोल गरे ।
पहिलो हाफमा ५ गोल गरेको अर्जेन्टिनाले दोस्रो हाफमा दुई गोल थपेको थियो । अर्जेन्टिनामा बुधबार बिहान भएको खेलमा मेस्सीले १७ मिनेटभित्रै ह्याट्रिक पूरा गरेका थिए ।२०औं मिनेटमा पहिलो गोल गरेका मेस्सीले ३३ र ३७औं मिनेटमा गोल गर्दै ह्याट्रिक पूरा गरे । उनको यो ३७औं ह्याट्रिक हो ।
२३औं मिनेटमा निकोलस गोन्जालेजले तथा ३५औं मिनेटमा एन्जोले गोल गरेका थिए । ७८औं मिनेटमा एन्जल डि मारियाले पेनाल्टीमा गोल गर्दै अर्जेन्टिनालाई फराकिलो जिततर्फ अग्रसर गराए । ८७औं मिनेटमा गोन्जालो मोन्टिएलले गोल गर्दै अर्जेन्टिनालाई फराकिलो जित दिलाए ।
