काठमाडौं । कोशी प्रदेश नामकरणको विषयलाई लिएर भइरहेको आन्दोलनमा आगजनी र तोडफोड नगर्ने र पक्राउ परेकाहरूलाई छाड्ने सहमति भएको छ ।
आज जिल्ला प्रशासन कार्यालय मोरङमा आन्दोलनरत पक्षका प्रतिनिधि, सुरक्षा निकायका प्रमुख लगायतको उपस्थितीमा यस्तो सहमती भएको हो । आन्दोलनका क्रममा आगजनी, तोडफोड र बन्दको कार्यक्रम नगर्ने सहमति पछि पक्राउ परेकाहरु रिहा हुने भएका हुन् ।
पक्राउ परेका २६ जनालाई विनाशर्त रिहाइको माग गर्दै पहिचानवादीले आम हड्तालका कार्यक्रम सार्वजनिक गरेका थिए । वार्तापछि आमहड्ताल फिर्ता लिने सहमति भएको छ । प्रशासन र आन्दोलनकारीबीचमा भएको सहमतिमा अब उप्रान्त कुनै पनि किसिमको आगजनी, तोडफोड, आवागमन अवरुद्ध, कार्यालय सञ्चालन अवरुद्ध लगायतका शान्ति सुव्यवस्थामा असर पुर्याउने कार्य नगरी कानुन सम्मत शान्तिपूर्ण रूपमा कार्यक्रमहरू सञ्चालन गर्ने भनिएको छ ।
जिल्लाको शान्ति सुरक्षा कायम राख्न सबैले सहयोग गर्ने र आन्दोलनको क्रममा पक्राउ परेका व्यक्तिहरू छुटेपछि आम हड्ताल फिर्ता लिने सहमति गरिएको छ । उनीहरूलाई आजै छाड्ने प्रशासनले तयारी गरेको छ ।
