काठमाडौं । हमासले थप १७ जना बन्धकलाई रिहा गरेको छ। जसमध्ये १३ जना इजरायली र चार जना थाई नागरिक छन्।
सट्टामा इजरायलले पनि आफ्ना जेलमा रहेका ३९ जना प्यालेस्टिनीलाई छाडेको छ। जसमध्ये ६ जना महिला छन् भने बाँकी सबै १८ वर्ष मुनिका छन्।बीबीसीका अनुसार उनीहरू वेस्ट बैंक र जेरुसेलम पुगेका छन्। यसैबीच हमासको नियन्त्रणमा रहेका भनिएका नेपाली विपिन जोशी पनि रिहा हुने अपेक्षा गरिएकोमा अझै प्रगति देखिएको छैन ।
यसका लागि सरकारले निरन्तर प्रयास गरिरहेको जनाएको छ। गत अक्टोबर ७ मा हमासले इजरायलमा आक्रमण गर्दा इजरायलीसहित विभिन्न देशका २४० नागरिकलाई बन्धक बनाएर गाजा लगेको बताइएको छ। जसमा नेपालका विपिन जोशी पनि रहेको भनिएको छ।
हमासको आक्रमणमा इजरायलमा १० नेपालीसहित १ हजार २ सय जना मारिएका थिए।कतारको मध्यस्थतामा स्थानीय समयानुसार शुक्रबार बिहानदेखि चार दिनका लागि हमास र इजरायलबीच युद्धविराम भएको छ।
यस अवधिमा दुवै पक्षले एकअर्काको नियन्त्रणमा रहेका नागरिक रिहा गर्ने सहमति छ। सोबमोजिम उनीहरू रिहा भइरहेका हुन्।अन्तर्राष्ट्रिय समुदाय र संयुक्त राष्ट्रसंघले इजरायललाई निरन्तर दबाब दिएपछि गत शुक्रबारदेखि चार दिनका लागि युद्ध रोकिएको हो।युद्धविरामको अवधि सकिएपछि हमासविरुद्ध गाजामा आक्रमण पुनः जारी राखिने इजरायलले बताइरहेको छ।