काठमाडौं । बझाङको प्रदेशसभा उपचुनावमा नेकपा एकीकृत समाजवादीसहित ८ उम्मेदवारले जमानत जोगाउन सकेनन् ।
एकीकृत समाजवादीका दिलबहादुर सिंह २ हजार ५१४ मतसहित चौथो बने पनि जमानत जोगाउन सकेनन् । अर्को सत्ता साझेदार नेकपा माओवादी केन्द्रले पनि मुश्किलले जमानत जोगाएको छ । तेस्रो बनेको माओवादी केन्द्रले भने ३ हजार ८३१ मतसहित जमानत जोगाएको छ । बझाङ प्रदेश सभा उपचुनावमा खसेको मतमध्ये २९ हजार ७०५ मत सदर भएको थियो । तर एकीकृत समाजवादीले भने सदर मतको १० प्रतिशत मत ल्याउन नसकेर जमानत जफत भएको हो ।
त्यस्तै, जमानत नजोगाउनमा राप्रपा पनि छ । राप्रपाका किशोरकुमार खड्काले २४२ मत पाएका छन् ।नेसनल रिपब्लिक नेपाल पार्टीका कमल घर्तीमगरले सवैभन्दा थोरै २ मत मात्रै पाए । नेपाल मजदुर किसान पार्टीका खगेन्द्रबहादुर शाहीले २४ मत, जनमत पार्टीकी सुशीला देवी विष्टले २६, संघीय लोकतान्त्रिक राष्ट्रिय मञ्चका दीपकबहादुर खड्काले २८, राष्ट्रिय मातृभूमि पार्टीमा गजेन्द्रबहादुर थापाले ३५ र जनता समाजवादी पार्टीका रामबहादुर जाग्रीले ४४ मत पाए ।
११ हजार ६१३ मत ल्याएर नेकपा एमालेका दमन भण्डारीले उपचुनाव जित्दा नेपाली कांग्रेसका अभिषेकबहादुर सिंहले ११ हजार ३४६ मत पाएका छन् । यो क्षेत्रमा ६१ हजार ७६८ मतदाता रहेकोमा ३० हजार ३२८ मत खसेको थियो ।