काठमाडौं । एएफसी एसियन कप छनोटको तयारीमा कतारमा रहेको नेपाली राष्ट्रिय फुटबल टोलीले आज टिमोर लिस्टेको यू-२३ टोलीसँग मैत्रीपूर्ण खेल खेल्दैछ ।
दोहाको ग्राण्ड हमाद स्टेडियमा नेपालले टिमोर लिस्टेसँग खेल्नेछ । खेल नेपाली समय अनुसार राति ९:४५ बजे सुरु हुनेछ ।एसियन कप छनोट अघि दोहामा दुई मैत्रीपूर्ण खेल खेल्ने तालिका अनुसार नेपालले पहिलो खेल टिमोर लिस्टेसँग खेल्न लागेको हो । नेपालले जेठ २० गते ओमानसँग मैत्रीपूर्ण खेल्ने तालिका छ ।
तर, दुबै खेल मैत्रीपूर्ण अभ्यास खेलका रुपमा छन । फिफाले दुई मैत्रीपूर्णलाई अन्तर्राष्ट्रिय मैत्रीपूर्णको मान्यता दिएको छैन । नेपाली टोली कतारबाटै छनोटका लागि कुवेत जाने छ ।
छनोटमा नेपाल समूह 'ए' मा छ । नेपाल रहेको समूहमा कुवेत, इन्डोनेसिया र जोर्डन छन् ।छनोट खेलहरु जुन ८ देखि १४ सम्म हुनेछन । नेपालले जुन ८ मा जोर्डनसँग खेल्दै छनोटको सुरुआत गर्नेछ । दोस्रो खेलमा नेपालले जुन ११ मा कुवेतको सामना गर्नेछ । नेपालले जुन १४ मा इन्डोनेसियाविरुद्ध खेल्नेछ । हरेक समूहका शीर्ष टोली र ५ समूहको उत्कृष्ट दोस्रो टोली चीनमा आयोजना हुने एसियन कप २०२३ मा छनोट हुनेछन् ।