काठमाडौं । आन्तरिक विवादकाबीच जनता समाजवादी पार्टी जसपामा मन्त्री हेरफेरको तयारी भएको छ । अध्यक्ष उपेन्द्र यादवले तीन जना मन्त्रीलाई सरकारबाट फिर्ता बोलाउँदै नयाँलाई सिफारिस गरेका छन् ।
कृषि मन्त्री महिन्द्र राय यादव, भौतिक पूर्वाधार मन्त्री रेणु यादव र वन मन्त्री राम सहाय यादवलाई अध्यक्ष यादवले फिर्ता बोलाएका छन् । उनीहरुको स्थानमा इस्तियाक राई, प्रदीप यादव र मृगेन्द्र सिंहलाई सिफारिस गरिएको छ । संघीय मामिला तथा सामान्य प्रशासन मन्त्री राजेन्द्र श्रेष्ठलाई भने निरन्तरता दिइएको छ ।
राईलाई भौतिक पूर्वाधार, यादवलाई वन र राष्ट्रिय सभा सदस्य सिंहलाई कृषि मन्त्रीको रुपमा सिफारिस गरिएको यादव निकटले बताएका छन् । जसपामा संघीय परिषद अध्यक्ष डा.बाबुराम भट्टराई र केन्द्रीय समिति अध्यक्ष उपेन्द्र यादवबीच मतभेद उत्कर्षमा छ ।
आन्तरिक विवादमा भट्टराई क्याम्पमा रहेका तीनैजनालाई आफूतिर तानेर यादवले मन्त्रीमा सिफारिस गरेका हुन् । हटाउन खोजिएकामध्ये महिन्द्र भट्टराई समूहका हुन् भने अन्य दुईजना यादव निकट मानिन्छन् ।
आइतबार बेलुका प्रधानमन्त्री शेरबहादुर देउवालाई भेटेर अध्यक्ष यादवले नयाँ मन्त्रीको सूची बुझाएका छन् । यद्यपी आन्तरिक विवाद चलिरहेकाले प्रधानमन्त्री देउवा असमञ्जसमा रहेको बालुवाटार निकट स्रोतले जनाएको छ । देउवा अध्यक्ष भट्टराईसँग सल्लाह गरेर मात्रै मन्त्रीपरिषद हेरेफेर गर्ने मुडमा छन् ।
भट्टराई पक्षले अब पार्टी विभाजन हुन लागेकाले दुई मन्त्री आफूले पाउनुपर्ने अडान राखेको छ । प्रधानमन्त्री देउवाले पनि भट्टराईको सहमति विना मन्त्री नफेर्ने आश्वासन दिएका छन् ।
नयाँ मन्त्री सिफारिस गर्दा उपेन्द्र यादवले भट्टराईसँग कुनै परामर्ष भने गरेका थिएनन् । वरिष्ठ नेता अशोक राई पक्षलाई रिझाउन उनले सामान्य प्रशासन मन्त्री राजेन्द्र श्रेष्ठलाई भने निरन्तरता दिएका छन् ।