एजेन्सी । उत्तर प्रदेशको प्रयागराजमा त्यहाँका पूर्व सांसद अतिक अहमद र उनका भाइ अशरफको गोली हानी हत्या गरिएको छ ।
बिबिसी हिन्दीका अनुसार उत्तर प्रदेश प्रहरीले पूर्व सांसद अतिक अहमद र उनका भाइको हत्या भएको पुष्टि गरेको छ । प्रहरीका अनुसार आक्रमणकारीहरु पत्रकार बनेर आएका थिए । तीन आक्रमणकारी पक्राउ परेका छन् ।
यसैबीच मुख्यमन्त्री योगी आदित्यनाथले यस घटनालाई लिएर उच्चस्तरीय बैठक बोलाएका छन् । अतिक अहमदलाई प्रहरी सुरक्षामा गाडीबाट बाहिर निकालेर स्वास्थ्य परीक्षणका लागि लैजाने क्रममा गोली प्रहार भएको थियो । अतिक र उनका भाइको हात हत्कडीमा बाँधिएको थियो ।
विधायक राजु पालको हत्याको आरोपमा अतिक अहमद र उनका भाइ अशरफ जेलमा परेका थिए।
हत्याका बेला अतिक अहमदका वकिल विजय मिश्रा पनि घटनास्थल नजिकै थिए । सञ्चारमाध्यमसँग कुरा गर्दै उनले भने, "अतीक अहमद र अशरफलाई कारबाट बाहिर निकाल्दै थिए। त्यतिकैमा गोली चलेको आवाज सुनियो। गोली चलाउनेहरूलाई प्रहरीले तुरुन्तै समात्यो।"
दुई दिन अघि मात्रै अतिक अहमदका छोरा असद र उनका सहयोगी गुलाम मोहम्मदलाई झाँसीमा उत्तर प्रदेश प्रहरीको विशेष कार्य बलले एनकाउन्टरमा मारेको थियो ।