काठमाडौं । जम्मु–कश्मीरमा भारतीय सेनामाथि आक्रमण हुँदा पाँच जनाको मृत्यु भएको छ । जम्मु कश्मीर को पुँछ भन्ने ठाउँमा भारतीय सेना चढेको गाडीमा ग्रिनेड आक्रमण भएको भारतीय सञ्चार माध्यमले जनाएका छन् ।
यो आक्रमणमा चरमपन्थी समूहको हात रहेको भारतीय सेनाले जनाएको छ । भारतीय सेनाको नर्दन कमाण्ड हेडक्वाटरबाट जारी विज्ञप्ति अनुसार बिहीबार दिउँसो करिब ३ बजे सेना चढेको गाडीमा चरमपन्थीहरुले हाते ग्रिनेड हानेका थिए । त्यसपछि गाडीमा आगो लागेको थियो ।
यो घटनामा राष्ट्रिय राइफल्सका पाँच जवानको मृत्यु भएको विज्ञप्तिमा उल्लेख छ । उनीहरु चरमपन्थीहरुविरुद्ध चलाइएको अभियानमा तैनाथ थिए ।आक्रमणमा एक जना गम्भीर घाइते भएको र उनको उपचार रजौरीस्थित सैनिक अस्पतालमा भइरहेको भारतीय मिडियाहरुले जनाएका छन् ।
