काठमाडौं । बंगालको खाडीको मध्यपश्चिम क्षेत्र आसपास विकसित ‘मिचाउङ’ नामको शक्तिशाली सामुद्रिक आँधीले भारतमा कम्तीमा पाँचजनाको मृत्यु भएको छ ।
आँधीका कारण चेन्नईमा भारी वर्षा भइरहेको छ । पाँचजनामध्ये दुईजनाको करेन्ट लागेर र एकजनाको रुख ढलेर मृत्यु भएको प्रहरीलाई उधृत गर्दै संचार माध्यमहरुले जनाएका छन् । अन्य दुईजनाको मृत्युको कारण खुल्न सकेको छैन ।
प्रतिकूल अवस्थाको पूर्वानुमान गर्दै तमिलनाडु सरकारले चेन्नईलगायत केही जिल्लामा बिदा दिएको छ ।
राज्यका सबै ठूला सुरुङहरू पानीले भरिएपछि बन्द गरिएका छन् ।
मिचाउङ’का कारण आएको भारी वर्षाका कारण चेन्नईलगायत धेरै जिल्लामा सडक डुबानमा परेको छ । चेन्नईका धेरै ठाउँमा रुख सडकमा ढलेका छन् ।
वर्षाका कारण चेन्नईको घरेलु र अन्तर्राष्ट्रिय विमानस्थलमा बाढी आएको छ । जसका कारण उडान र अवतरण रोकिएको छ ।
विमानस्थल प्रशासनले सोमबार रातिसम्मका सबै उडान रद्द गरेको थियो । करिब १५० उडान सेवा प्रभावित भएको छ ।
भारतको मौसम विभागका अनुसार उक्त चक्रवात चेन्नईबाट १३० किलोमिटर उत्तरमा छ ।
