काठमाडौं । चीनले तालिबान सरकारबाट नियुक्त राजदूत नियुक्त बिलाल करीमीलाई मान्यता दिएको छ ।तालिबान कूटनीतिज्ञलाई राजदूतको मान्यता दिने चीन पहिलो देश बनेको बीबीसीले जनाएको छ ।
यसअघि चीनले तालिबानद्वारा नियुक्त बिलाल करीमीलाई राजदूतको दर्जा दिएको र उनले आफ्नो परिचयपत्र चीन सरकारमा पेश गरेको समाचार काबुलबाट सार्वजनिक भएको थियो ।
चिनियाँ विदेश मन्त्रालयका प्रवक्ता बाङ वेनबिनलाई मंगलबार मिडिया ब्रिफिङको क्रममा चीनले तालिबानलाई वैधानिक सरकारको रुपमा मान्यता दिन्छ कि दिँदैन भनेर सोधिएको प्रश्नमा उनले ‘अफगानिस्तान लामो समयदेखि चीनको मित्रवत सम्बन्ध छ । अफगानिस्तानलाई अन्तर्राष्ट्रिय समुदायबाट बेदखल गर्नु हुँदैन ।’ भनेर जवाफ दिएको बीबीसीले जनाएको छ ।
सन् २०२१ को अगष्टमा अमेरिकी सैनिक फिर्ता भएपछि तालिबानले सत्ता हातमा लिन सफल भएको थियो । तालिबान सरकारमा आएपछि राजधानी काबुलमा दूतावास राख्ने चीन तेस्रो देश हो । चीन अघि पाकिस्तान र रुसले दूतावास राखेका थिए ।हालै भारतमा अफगानिस्तानको दूतावास बन्द गरिएको थियो । तर चीनले भने राजदूतलाई मान्यता दिएको छ ।