दीपेन्द्र कुँवर-
काठमाडौं । त्रिकोणात्मक टी–२० आई सिरिजको जित्नै पर्ने दबाब रहेको खेलमा नेदरल्याण्डसमाथि ६ विकेटको जित निकाल्दै नेपाल फाइनल प्रवेश गरेको छ ।
आजको जितले रन रेटमा राम्रो सुधार भएपछि नेपाल फाइनल पुग्न सफल भयो । सिरिजमा नेदरल्यान्ड्स र नामिवियाबीचको एक खेल बाँकी छँदा २ मा जित र १ मा हारसहित नेदरल्यान्ड्स ४ अंकका साथ शीर्षस्थानमा छ । नेदरल्यान्ड्सको नेटरनरेट ०.३१० छ ।
नेपाल ४ खेलमा २ मा जित र २ हारसहित ४ अंक लिएर नेटरनरेट ०.२९३ सहित दोस्रो स्थानमा छ । नामिविया ३ खेलमध्ये १ मा जित र २ मा हारसहित २ अंकका साथ तालिकाको पुछारमा छ । नामिवियाको नेटरनरेट माइनस ०.७०० छ ।
आइतबार नेदरल्यान्ड्स विजयी भए सोझै फाइनलमा पुग्नेछ । नामिबिया विजयी भएमा भने नेटरनरेटमा भर पर्नेछ । दुईमध्ये नेटरनरेटमा माथि रहने टोलीले फाइनल खेल्नेछ । नेटरनरेटमा नेदरल्यान्ड्स र नामिविया मध्ये एक टोली फाईनल जानेछ । नेपाल पहिलो खेलमा नामिवियासँग २० र दोस्रो खेलमा नेदरल्यान्ड्ससँग २ रनले हारेको थियो । तर तेस्रो खेलमा नामिवियालाई ३ रन र समूह चरणको अन्तिम खेलमा नेदरल्यान्ड्सलाई ६ विकेटले पराजित गर्यो ।
कीर्तिपुर मैदानमा नेदरल्याण्डसले दिएको १ सय २१ रनको लक्ष्य पछ्याएको नेपालले १५.२ ओभरमा ४ विकेट गुमाएर भेट्टायो । नेपालको जितमा कप्तान रोहित पौडेलले ४६, गुल्सन झाले ३८, कुशल भुर्तेलले १२ र आसिफ शेखले ८ रन जोडे ।
टस जितेर पहिले ब्याटिङ गरेको नेदरल्याण्ड्सले १९. ३ अल आउट हुँदै १२० रन मात्रै बनाउन सक्यो । नेदरल्याण्ड्सका म्याक्स ओडाउडले सर्बाधिक ३१ रन बनाए । टिम भान डर गुगटेन र रोलेफ भान डर मर्वेले २३-२३ र स्कट एडवार्ड्सले १८ रन बनाउन बाहेक अन्य ब्याटरले दोहोरो अंकमा रन बनाउन सकेनन् । नेपालका प्रतिश जिसीले तीन, करण केसी र कुशल मल्लले दुई-दुई र दीपेन्द्रसिंह ऐरीले एक विकेट लिएका थिए ।
नेपाली बलर डच ब्याटरमाथि शुरुदेखि नै हावी देखिए । पहिलो ओभरमै करण केसीले दुई विकेट लिएपछि नेपालको खेलले लय समात्यो । जसलाई अरु बलरले पनि पछ्याएर नेपाली बलरले रन रोक्दै विकेट लिए । आज पेश बलरले ५ र स्पिनरले तीन विकेट लिए ।
