काठमाडौं । भारत भ्रमणमा रहेको नेपाली टोलीले त्रिकोणात्मक टी-२० सिरिजअन्तर्गत दोस्रो खेलमा आज बरोडासँग खेल्दैछ । खेल नेपाली समय अनुसार दिउँसो २ : ४५ मा सुरु हुनेछ ।
नेपालले पहिलो खेलमा गुजरातलाई ८ विकेटले हराएको थियो । गुजरातले सोमबार बरोडालाई ५ विकेटले हराएको थियो । नेपाल लगातार दोस्रो र बरोडा पहिलो जितको खोजीमा छ ।पहिलो खेलमा ९९ रनको लक्ष्य नेपालले १५.२ ओभरमा २ विकेट गुमाउँदै पूरा गरेको थियो ।
गुजरातलाई ९८ रनमा अल आउट गर्न गुलशन झाले ४ र करण केसीले ३ विकेट लिएका थिए ।दुई सातापछि ओमानमा हुने एसीसी प्रिमियर कपको लागि नेपालले भारतमा तयारी गरेको हो ।
बरोडाको टोलीमा अधिकांश रणजी खेल्ने दोस्रो रोजाइका खेलाडी छन् । बरोडाको कप्तानी विष्णु शोलंकीले गर्नेछन् । ३१ वर्षीय शोलंकीले ४१ प्रथम श्रेणी, ५० लिष्ट ए र ६२ टी–२० खेल खेलेका छन् । त्यस्तै भारतबाट यू १९ क्रिकेट खेलेका शस्वात रावत पनि बरोडाको टोलीमा छन् । अभिमन्युसिंह राजपुत र भानु पनिया पनि छन् । बुधबार नेपालले गुजरात र शुक्रबार बरोडासँग खेल्नेछ । फाइनल पुगे आइतबार खेल्नेछ ।
