काठमाडौं । एसीसी प्रिमियर कप २०२४ मा नेपालले विजयी शुरुवात गरेको छ । ओमानमा जारी प्रतियोगितामा नेपालले मलेसियालाई ५ विकेटले हरायो । मलेसियाले दिएको १ सय ४४ रनको लक्ष्य नेपालले ४ बल बाँकी छँदै ५ विकेट गुमाएर पुरा गर्यो ।
नेपालको जितमा गुलशन झाले ७ बलमा १ चौका र २ छक्कासहित १९ तथा सन्दीप जोरा १२ रन बनाउँदै नट आउट रहे ।
कप्तान रोहित पौडेलले आउट हुनु अघि २४ बलमा १ छक्कासहित २८ रन बनाए । यस्तै आसिफ शेख ३५ बलमा ४ चौकासहित ३२, कुशल भुर्तेल २४ बलमा ३ चौकासहित २४, दीपेन्द्रसिंह ऐरीले ११ बलमा २ चौका र १ छक्कासहित २० र कुशल मल्ल ७ रन जोडे ।
ओपनर आसिफ शेख र कुशल भुर्तेलले ७.५ ओभरमा ४९ रनको साझेदारी गरेका थिए । मलेसियाका विरनदीप सिंहले ४ ओभरमा ३५ रन खर्चेर ३ विकेट लिए । पवनदीपसिंह र मोहम्मद वाकिफले १–१ विकेट लिए ।
त्यसअघि अल अमरेत क्रिकेट मैदान १ मा टस जितेर पहिला ब्याटिङ रोजेको मलेसियाले २० ओभरमा ३ विकेट गुमाउँदै १४३ रन बनायो ।मलेसियाका कप्तान विरनदीप सिंह ५५ बलमा ३ चौका र ४ छक्कासहित सर्वाधिक ६८ रन बनाए । मलेसियालाई ओपनर विरनदीप सिंह र मोहम्मद आमिरले ५।१ ओभरमा ३५ रनको साझेदारी गर्दै मध्यम सुरुवात दिलाएका थिए । नेपालका दीपेन्द्रसिंह ऎरीले २ विकेट लिए । यस्तै अभिनाश बोहराले १ विकेट लिए ।
