काठमाडौं । नेपालले ओमानमा जारी एसीसी प्रिमियर कपको आफ्नो दोस्रो खेलमा आज कतारको सामना गर्दैछ ।
खेल दिउँसो ४ः१५ मा अल अमरेत क्रिकेट मैदान–१ मा सुरु हुनेछ । नेपालले पहिलो खेलमा मलेसियालाई ५ विकेटले हराएको थियो ।
कतार पहिलो खेलमा हङकङसँग २६ रनले पराजित भएको थियो । २०२ रनको लक्ष्य पछ्याउने क्रममा कतारले १७५ रन बनाएको थियो । नेपालले भने मलेसियाले दिएको १४४ रनको लक्ष्य १९.२ ओभरमा पूरा गरेको थियो ।
नेपाल र कतारबीच हालसम्म एक मात्रै टी–२० आई खेल भएको छ । आईसीसी टी-२० विश्वकप एसिया क्षेत्र फाइनल २०१९ मा नेपालले दिएको १२३ रनको लक्ष्य कतारले १९.२ ओभरमा ६ विकेट गुमाउँदै पूरा गरेको थियो । १० टोली सहभागी यस प्रतियोगिता विजेताले टी–२० एसिया कप खेल्न पाउनेछ ।
