काठमाडौं । नेपाली राष्ट्रिय क्रिकेट टोलीले एसीसी प्रिमियर कप अन्तर्गत समूह ए को तेस्रो खेलमा हङकङविरुद्ध जितका लागि १ सय १५ रनको सामान्य लक्ष्य पाएको छ ।
अल अमेरत मैदानमा टस हारेर ब्याटिङ गरेको हङकङले निर्धारित १८ ओभरको खेलमा ११४ रन बनाएर १ बल अघि नै अलआउट भयो । नेपालले उत्कृष्ट बलिङ र फिल्डीङ गर्यो । वर्षाका कारण केही ढिलो सुरु भएको खेल १८ ओभरमा झारिएको थियो ।
ओपनर मार्टिन कोट्जीलाई ८ रनमा तेस्रो ओभरमा गुमाएको हङकङका लागि अंशुमन रथले २६ बलमा ४ चौका र १ छक्कासहित सर्वाधिक ३४ रनको योगदान दिए । रन जोडे ।
जिशान अली १४, निजाकत खान १२, एहसान खान ११, एजाज खान ७, बाबर हायात ६,नसरुल्ला राना ६ र यासिम मुर्तजा २ रनमा आउट भए । नेपालका लागि अभिनाश बोहोराले ३ तथा ललित राजवंशीले एक मेडनसहित २ विकेट लिए । दीपेन्द्रसिंह ऐरीले अन्तिम २ बलमा २ विकेट तथा करण केसीले १ विकेट हात पारे ।
नेपाल लगातार तेस्रो जितको खोजीमा छ । आजको खेल जिते समूह विजेता बनेर सेमिफाईनल पुग्ने नेपालको सम्भावना बलियो हुनेछ ।
