काठमाडौं,भदौ २३ । नेपाली काँग्रेसले गत पुसमा क्रियाशील नवीकरण गरेका तर प्राविधिक रुपमा अद्यावधिक नभएका सदस्यहरुलाई समेत पार्टीको १५ औँ महाधिवेशनमा सहभागि गराउने निर्णय गरेको छ ।
पार्टीको केन्द्रिय कार्यसम्पादन समितिको सोमवारको बैठकले यस्तो निर्णय गरेको पार्टी प्रवक्ता देवराज चालिसेले जानकारी दिए । तर पुसमा नवीकरण गरेका सदस्यहरुको हकमा समेत तीन वटा शर्तहरु लागू हुने उनको भनाइ छ । उनका अनुसार पार्टीको १५औँ महाधिवेशनमा सहभागि हुनको लागि पार्टी अनुशासन उल्लङ्घन नगरेको, पार्टी सदस्यता त्याग नगरेको तथा कानूनले दलको सदस्य बन्नको लागि निषेध नगरेको हुनुपर्नेछ ।
यसअघि पार्टीका निःवर्तमान सभापति शेरबहादुर देउवा समूहले गत पुसमा नविकरण गरिएका क्रियाशील सदस्यलाई अद्यावधिकको बाध्यकारी प्रक्रियामा सहभागी हुनुपर्ने व्यवस्था हटाउन माग गर्दै आएको थियो । बैठकले सोही मागलाई सम्बोधन गर्न यस्तो निर्णय गरेको उनले बताए ।
उनले भने, ‘पार्टीको १५ औँ महाधिवेशनका लागि पुसको महिनामा नवीकरण गरिसकेकाहरुको हकमा अद्यावधिक नगरेपनि पनि केही शर्तमा सहभागि हुन पाउने निर्णय गरेका छौँ । पार्टी अनुशासन उल्लङ्घन नगरेको, पार्टी सदस्यता त्याग नगरेको वा कानूनले दलको सदस्य बन्नको लागि निषेध नगरेको हुनुपर्नेछ ।
त्यो संख्या हरेक दलमा ठूलो संख्यामा रहेका छन् । यी बाहेक सबैले महाधिवेशनमा सहभागि हुने बाटो खुला गरिदिएका छौँ । यसले सबै साथीहरुलाई सहभागि हुन ढोका खोलेको छ । राम्रो एजेण्डा लिएर जनमत निर्माण गर्ने अधिकार पनि सबै नेतामा छ । ती आफ्ना फरक मतहरुलाई अधिवेशनको हलमा मतमा परिणत गर्नको लागि सबैलाई मौका छ ।’
त्यसैगरी बैठकले रसुवाको भोटेकोशी बाढी प्रभावित क्षेत्रमा खोज, उद्धार तथा राहत वितरणमा सरकारलाई सहयोग गर्ने निर्णय पनि गरेको छ । उनले राहत तथा उद्धारको कार्य थप प्रभावकारी बनाउन सरकारलाई आग्रह समेत गरे । –न्युज एजेन्सी नेपाल
