काठमाण्डौ । वेल्स यसै वर्ष कतारमा आयोजना हुने फिफा विश्वकप फुटबलमा छनोट भएको छ ।
यूईएफए छनोट अन्तर्गत आइतबार राति भएको प्ले अफ फाइनलमा युक्रेनलाई १–० ले हराउँदै वेल्सले विश्वकपको टिकट काटेको हो । कार्डिफ सिटी स्टेडियममा वेल्सलाई जिताउन आत्मघाती गोल निर्णायक बन्यो ।
खेलको ३४ औं मिनेटमा वेल्सका गारेथ बेलले प्रहार गरेको फ्रि किक हेड मार्फत क्लियर गर्ने कोशिसमा एन्ड्री यार्मोलेन्कोले आफ्नै पोष्टमा बल छिराए । वेल्स सन् १९५८ पछि पहिलो पटक विश्वकपमा छनोट भएको हो ।
अब वेल्सले समूह 'बी' मा रहेर विश्वकप खेल्नेछ । यो समूहमा इंग्ल्यान्ड, अमेरिका र इरान छन् ।