काठमाण्डौ । अर्जेन्टिनाले मैत्रीपूर्ण अन्तर्राष्ट्रिय खेलमा इस्टोनियालाई ५–० ले पराजित गरेको छ । आईतवार राति भएको खेलमा अर्जेन्टिनाका सबै पाँच गोल कप्तान लियोनल मेसीले गरे ।
आफ्नो उत्कृष्ट लय कायम राखेको अर्जोन्टिनाका लागि मेसीले आठौं मिनेटमा पेनाल्टीबाट पहिलो गोल गरे । त्यसपछि उनले ४५, ४७, ७१ र ७६ औं मिनेटमा गोल थपे । तीन दिन अघि अर्जेन्टिनाले युरोपेली च्याम्पियन इटालीलाई पनि ३–० ले हराएर 'फाईनलसीमा' प्रतियोगिताको उपाधि जितेको थियो ।
आइतबारकै अन्य मैत्रीपूर्ण खेलमा कोलम्बियाले साउदी अरेबिया र पेरुले न्युजिल्यान्डलाई समान १–० ले हरायो । उरुग्वे भने अमेरिकासित गोलरहित बराबरी रोकिएको छ ।
नेसन्स लिगका खेलमा भने पोर्चुगलले स्विट्जरल्यान्डलाई ४–० ले हरायो । त्यसमा क्रिस्टियानो रोनाल्डोले दुई गोल गरे । अर्को महत्त्वपूर्ण खेलमा स्पेन र चेक गणतन्त्रले २–२ को बराबरी खेले ।