आइसीसी विश्वकप क्रिकेट लिग टु अन्तर्ग नेपालले पहिलो खेलमा आज बिहीबार ओमानसँग प्रतिस्पर्धा गर्दैछ । अमेरिकाको ह्युस्टन स्थित मौसा क्रिकेट मैदानमा हुने खेल नेपाली समय अनुसार राती साँढे ९ बजे सुरु हुनेछ । जारी लिग टु को शिर्ष स्थानमा रहेको ओमानका लागि यो सिरिज अन्तिम हुनेछ । ओमानले अहिलेसमम ३३ खेलबाट ४० अंक बनाएको छ । धेरै खेल खेल्ने टिममा रहेको ओमानलाई यो सिरिजमा एक खेल जितेपनि शिर्ष तीनको यात्रा पक्का हुनेछ । जारी प्रतियोगितामा सबैभन्दा कम खेल खेल्ने टिममा नेपाल रहेको छ । नेपालले १२ खेलबाट १२ अंक बनाएको छ । जसमा ६ खेलमा जित निकाल्दा ६ खेलमा हारेको छ । लिग टु मा नेपालले ओमानसँग अहिलेसम्म चार खेल खेल्दा तीन खेलमा हार ब्यहोरेको छ भने एक खेलमा मात्र जित निकालेको छ । घरेलु मैदानमा २०२० मा भएको सिरिजमा नेपालले दुई खेलमा हार ब्यहोरेको थियो भने ओमानमा नै भएको सिरिजमा एक खेलमा हारेको थियो । पछिल्लो पटक ओमानको टिम केही खस्केको छ । पछिल्लो पटकका नतिजाले टिममा खेलाडीको कम्बिनेसनमा केहि समस्या देखिएको छ । ओमानले अमेरिकामा घरेलु टिमसँग खेल्दा एक सय १४ रनको हार ब्यहोरेको थियो । जसका कारण पनि नेपाली टिमलाई ओमानको कमजोरीको फाइदा हुनसक्छ । यता नेपाली टिमले ओमानविरुद्धको खेलबाट नै विजयी सुरुवात गर्ने योजना बनाएको छ । नेपाली टिममा ओमानविरुद्धको खेलमा ओपनिङ जोडीमा परिवर्तन हुने देखिएको छ । नियमित ओपनर आशिफ शेख फिट छैनन् भने कुशल भुर्तेल भने निको हुने क्रममा छन । त्यसैले प्रशिक्षक पुबुदुले नयाँ विकल्प लगाउने संभावना छ । जसमा सुवास खकुरेल र सुनील धमला बिकल्पमा रहेका छन । जारी लिग टु मा छैटौं स्थानमा रहेको नेपालभन्दा अगाडी नामिबिया (१४ खेलबाट १४ अंक), अमेरिका (२१ खेलबाट २० अंक), युएई (२२ खेलबाट २६ अंक, र स्कटल्याण्ड (२० खेलबाट २८ अंक) छन । अमेरिका सिरिजमा चार खेलमा चारमा नै जित निकाल्न सकेको खण्डमा नेपालले शिर्ष तीनका लागि आफुलाई दावेदारका रुपमा उभ्याउनेछ । नेपालको संभावित ११ सन्दिप लामिछाने दिपेन्द्रसिंह ऐरी रोहित पौडेल आरिफ शेख बिनोद भण्डारी सोमपाल कामी करण केसी सुनील धमला देब खनाल सागर ढकाल सुवास खकुरेल वा कुशल भुर्तेल