काठमाडौं । यो वर्षको तिहार सकिएको छ । हिजो भाइटीका लगाएसँगै उज्यालो पर्व तिहार सकिएको हो । यसपालिको तिहारमा साढे २४ लाखभन्दा धेरै फूलमालाको कारोबार भएको फ्लोरिकल्चर एसोशिएसनले जनाएको छ । यस्तै, तिहारका लागि मात्रै भनेर झण्डै ७५ करोड रुपैयाँ बराबरको फलफूल आयात भएको छ ।
तिहार सकिएसँगै छठपर्वको रौनक सुरु भएको छ । सन्तान प्राप्ति, रोग निदान र पारिवारिक कल्याणका लागि मनाइने छठपर्वलाई अहिंसाप्रति मानवको रुचि बढाउने र सबै जीवप्रति सहानुभूति राख्न अभिप्रेरित गर्ने पर्वको रुपमा लिइन्छ ।
मधेस प्रदेशको राजधानी जनकपुरधामसहित तराई–मधेसमा छठको रौनक शुरु भएको छ । लक्ष्मीपूजाको चार दिनपछि अर्थात् कात्तिक शुक्लपक्षको चौथी तिथिका दिनबाट छठपर्व विधिवत् रूपमा आरम्भ हुन्छ।
यसअघिका दुई वर्ष कोराना (कोभिड-१९) सङ्क्रमण सन्त्रासले धक खोलेर पर्व मनाउन नपाइएको सम्झँदै यसपालि भने महाव्याधि नभएपछि पर्व मनाउन सहज भएको छ ।
काठमाडौं उपत्यकाका विभिन्न पोखरी तलाउमा पनि छठपर्वको दिन छठी माताको पूजा अर्चना गरिन्छ । आगामी आइतवार छठको मुख्य दिन सरकारले सार्वजनिक बिदा दिएको छ ।