काठमाडौं । कार्यस्थलमा सुरक्षाको माग गर्दै चिकित्सकले काठमाडौंमा बिहीबार पनि प्रदर्शन जारी राखेका छन् । अस्पतालहरुमा चिकित्सकहरुमाथि हातपात हुन थालेपछि आवासीय चिकित्सकले केही दिनदेखि काठमाडौंमा प्रदर्शन गरिरहेका छन् ।
उनीहरुले आज नयाँबानेश्वर–माइतीघर सडकखण्डमा प्रदर्शन गरेका हुन् । बबरमहल तर्फबाट आएको चिकित्सकहरुको जुलुश नयाँबानेश्वर चोकतर्फ अघि बढ्न खोजेपछि प्रहरीले रोक्दा ठेलमठेल भएको थियो । निषेधित क्षेत्रभित्र प्रवेश गर्न नदिन ठूलो संख्यामा प्रहरी परिचालन गरिएको थियो ।
चिकित्सकहरुले भने आफूहरुको प्रदर्शन शान्तिपूर्ण रहेको भन्दै अगाडि बढ्न दिन माग गरेका थिए । तर प्रहरीले निषेधित क्षेत्रभित्र प्रवेश गर्न नदिने भन्दै उनीहरुलाई रोक्यो । प्रहरीले रोकपछि चिकित्सकहरुले ‘प्रहरी दमन बन्द गर’ भन्दै नारा लगाए । बीच सडकमै विरोध प्रदर्शन गर्दा यातायात आवागमन प्रभावित हुने गरेको छ ।