काठमाडौं । नेपालले भारतमा जारी एसएमएस फ्रेन्डसिप टी–२० कप त्रिकोणात्मक श्रृंखलामा बरोडालाई १५७ रनको लक्ष्य दिएको छ ।
टस हारेर पहिला ब्याटिङ गरेको नेपालले २० ओभरमा ६ विकेट गुमाउँदै १५६ रन बनायो । राम्रो शुरुवात नभएपनि नेपालले मध्यम योगफल खडा गर्यो । नेपालका कुशल मल्ल२५ बलमा ३ चौका र २ छक्कासहित सर्वाधिक ४० र दीपेन्द्र सिंह ऐरी ५ रनमा नट आउट रहे ।
सन्दीप जोरा १६ बलमा समान २ चौका र छक्कासहित २९ रन बनाएर रनआउट भए । एक समय १२.५ ओभरमा ८२–५ को अवस्थामा पुगेको नेपाललाई छैटौं विकेटका लागि सन्दीप र कुशलले २९ बलमा ४७ रनको साझेदारी गर्दै सम्हाले ।
ओपनर आसिफ शेख र कुशल भुर्तेल ९–९ रनमा आउट भएए । अनिल कुमार साह २७ बलमा २ चौका र १ छक्कासहित २५ रनमा आउट भए । कप्तान रोहित पौडेल १३ बलमा ३ चौकासहित १८ र गुलशन झा १३ रनमा आउट भए ।
बरोडाका बाबा खानले २, मोहित मोंगिया र परिक्षित पाटिदारले १–१ विकेट लिए । नेपालले पहिलो खेलमा गुजरातलाई ८ विकेट र दोस्रो खेलमा गुजरातले बरोडालाई ५ विकेटले हराएको थियो ।
