काठमाडौं । भारतमा जारी एसएमएस फ्रेन्डसिप टी–२० कप त्रिकोणीय श्रृंखलामा नेपाल बरोडासँग ३७ रनले पराजित भएको छ । १५७ रनको लक्ष्य पछ्याएको नेपाल १८.५ ओभरमा ११९ रनमा अल आउट भयो ।
नेपालका सन्दीप जोराले ४३ बलमा ३ चौका र ४ छक्कासहित सर्वाधिक ५६, कुशल भुर्तेल १६, विवेक यादवले १७ रन बनाए । यस्तै कुशल मल्ल ३, दीपेन्द्रसिंह ऐरी २, अनिलकुमार शाह र गुलशन झा १–१ रन र करण केसी शून्यमा आउट भए ।
बरोडाका ध्रुव पटेलले ३।५ ओभरमा १६ रन खर्चेर ४ विकेट लिए । लक्षित तोक्सियाले ३, जय अभले २ विकेट लिए ।
त्यसअघि टस जितेर पहिला ब्याटिङ गरेको बरोडाले २० ओभरमा ८ विकेट गुमाउदै १५६ रन बनाएको थियो । बरोडाका ध्रुव पटेलले १४ बलमा २ चौका र २ छक्कासहित २९, शाश्वत रावत ३१ र मोहित मोगिंयाले २२ रन बनाए ।
नेपालका करण केसी र गुलशन झाले २–२ विकेट लिए । आकाश चन्द, प्रतिश जि.सी र ललित राजवंशीले १–१ विकेट लिए । यसअघि नेपालले गुजरातलाई ८ विकेट र ८ रन तथा बरोडालाई २७ रनले हराएको थियो । नेपालले फाइनलमा आइतबार गुजरातसँग खेल्नेछ ।