गुल्मी । गुल्मी र अर्घाखाँचीका विभिन्न ठाउँका वनमा लागेको डढेलो गाउँमा सल्किँदा कम्तीमा ४० वटा घर र गोठ जलेका छन् । यस्तै कम्तीमा ५० पशु चौपाया मरेका छन् । गुल्मीको इस्मा गाउँपालिका–२ मा आगलागी हुँदा ३८ घरगोठ जलेका छन् । स्थानीय सामुदायिक वनमा लागेको आगो बस्तीमा पनि फैलिँदा १३ घर र २५ गोठ जलेका छन् । घरगोठ जल्दा ४० भन्दा बढी भैंसी तथा बाख्रा पनि जलेका छन् ।आगो निभाउने प्रयास भैरहेको छ ।
आगलागीबाट इस्मा गाउँपालिका– १ उजुङका १९ बर्षीय हिमाल राना र मुसिकोट नगरपालिका–७ का २१ बर्षीय प्रेम राना घाइते भएका छन् । उनीहरुलाई उपचारका लागि गुल्मी अस्पतालबाट पाल्पाको लुम्बिनी मेडिकल कलेज प्रभास पठाइएको जिल्ला प्रहरी कार्यालयले जनाएको छ । यस्तै मदाने गाउँपालिका वडानंबर ६ तीन वटा घर गोठ जलेका छन् । यहाँ केही पशु चौपाया पनि मरेका छन् । धुर्कोट गाउँपालिका वडानंबर २ मा पनि भीषण आगो लागेको छ । आगो निभाउन सकिएको छैन, स्थानीयले आगो गाउँमा पस्न नदिने कोशिस गरिरहेका छन् ।
अर्घाखाँचीको भूमिकास्थान नगरपालिका वडा नं ३ र ४ धारापानीमा भीषण आगलागीका भएको छ । आगो अहिले पनि नियन्त्रण बाहिर रहेको जनाइएको छ । वनमा लागेको आगो हावाहुरीका कारण दिउँसो १ बजेतिर बस्तीमा पसेको थियो ।
भूमिकास्थान नगरपालिका धारापानीको रातामाटा, जाबुनडाँडा, बाजाखर्कलगायतका गाउँमा भएको भीषण आगलागीबाट झण्डै २० घरगोठ जलेर नष्ट भएको जिल्ला प्रहरी कार्यालय अर्घाखाँचीका सूचना अधिकारी दीपेन्द्र रावलले जानकारी दिए ।
